قازاقستاندىق فيلم الەمنىڭ 10 نان استام جۇلدەسىنە يە بولدى

الماتى. قازاقپارات - قازاقستاندا ءادىلجان ەرجانوۆتىڭ «لاسكوۆوە بەزرازليچيە ميرا» كينوكارتيناسى قازاقستاندىق پروكاتقا شىعادى، دەپ حابارلايدى قازاقپارات ءتىلشىسى.

اتالعان فيلمدە اۋىلدان كەلگەن عاشىقتاردىڭ قالاداعى ءومىرى تۋرالى ايتىلادى.

كينوتاسپا 22 - قاراشادا الماتى، استانا، شىمكەنت، اتىراۋ جانە قاراعاندى قالالارىندا پروكاتقا شىعادى. كورسەتىلىم 2 كۇنگە سوزىلادى.

«بۇل - ەڭ ۇلى سەزىم ماحاببات تۋرالى فيلم. قازىرگى قوزى مەن باياننىڭ تاريحى. كينو الماتى وبلىسىندا 1-اي شاماسىندا تۇسىرىلگەن» ، - دەدى اتالعان تۋىندىنىڭ رەجيسسەر ءادىلجان ەرجانوۆ.

بۇل كينو بۇعان دەيىن فرانتسۋز كورەرمەندەرىنە كورسەتىلگەن بولاتىن.

 «پاريجدە العاشقى دەمالىستا  15000 بيلەت ساتىلدى. سۇرانىستىڭ كوپتىگىنەن كينو فرانسيانىڭ باسقا دا قالالارىنا پروكاتقا شىقتى. فيلمدى فرانتسۋز پۋبليكاسى بىردەن قابىلدادى. بۇل اۆتورلىق فيلم پايدا تابۋ ءۇشىن تۇسىرىلمەگەن بولاتىن. ءبىراق، وتە ءساتتى شىقتى. كورەرمەن تاراپىنان سۇرانىس كوپ بولعان سوڭ تابىستى بولا باستادى. فيلم جارتى جىلدا 20 ەلدە كورسەتىلىپ، 10 نان اسا ماراپات ۇتىپ الدى» ، - دەدى پروديۋسەر سەرىك ابىشيەۆ.

ايتا كەتۋ كەرەك، كارتينانىڭ الەمدىك پرەمەراسى 71 كانن كينوفەستيۆالىنىڭ «ەرەكشە كوزقاراس» اتالىمىندا وتكەن بولاتىن.

ودان كەيىن كارلوۆى ۆارى، يەرۋساليم، ارمەني («التىن ورىك» ) ، فرانسيا (La Rochelle) ەلدەرىندەگى بايقاۋلارعا قاتىستى.

Almaty film festival بايقاۋىندا بۇل فيلم ەكى بىردەي اتالىم بويىنشا جەڭىمپاز اتاندى.

باستى رولدەردە قۋاندىق دۇيسەمبايەۆ، دينارا باقتىبايەۆا وينايدى.