قازاقستاندا وتكەن جىلعا قاراعاندا 10 مىڭ كولىك ارتىق ءوندىرىلدى

استانا. قازاقپارات - قازاقستاندا وتاندىق وندىرىستەگى اۆتوكولىكتەرگە دەگەن سۇرانىس جوعارى دەڭگەيدە ساقتالىپ وتىر، دەپ حابارلايدى قازاقپارات ءتىلشىسى قازاقستاندىق اۆتوبيزنەس قاۋىمداستىعىنا سىلتەمە جاساپ.

 قاۋىمداستىقتىڭ مالىمەتىنشە، وتاندىق اۆتووندىرۋشىلەر قازان ايىندا  3188 ءارتۇرلى ماركاداعى اۆتوكولىك مەن تەحنيكانى ساتۋعا شىعارعان. بۇل كورسەتكىش - وتكەن جىلدىڭ سايكەس كەزەڭىمەن سالىستىرعاندا ەكى ەسە كوپ.

«2018 -جىلدىڭ قاڭتار- قازان ايلارىندا قازاقستاندا بارلىق تيپتەگى  25879 كولىك (وتكەن جىلدىڭ ون ايىندا 15 051) ءوندىرىلدى. ءداستۇرلى تۇردە ءوسىمدى جەڭىل اۆتوكولىكتەر كورسەتسە (24 115، ءوسىم 86 پايىز)، ولارمەن بىرگە 10 ايدىڭ ىشىندە 882 اۋىر جۇك كولىگى (-21 پايىز)، 448 تىركەمە مەن جارتىلاي تىركەمە (106+ پايىز)، 249 اۆتوبۋس (54 - پايىز) پەن 163 ارنايى تەحنيكا ءتۇرى (13 - پايىز) وندىرىلگەن»، - دەلىنگەن حابارلامادا.

الدىنا الا بەرىلىپ وتىرعان اقپاراتقا سايكەس، قوستانايلىق «سارى اركا اۆتوپروم» 10 ايدىڭ ىشىندە  9321 جەڭىل اۆتوكولىك، اۋىر جۇك كولىگى مەن اۆتوبۋس قۇراستىرىپ، 132 پايىزدىق وسىمگە قول جەتكىزگەن. ال وسكەمەندەگى «ازيا اۆتو» كاسىپورنىندا قاڭتار- قازان ايلارىندا  15012 اۆتو (60 + پايىز) قۇراستىرىلعان. سونىمەن بىرگە كوكشەتاۋداعى «كاماز ينجينيرينگ» 440 جۇك كولىگىن، سەمەيلىك سەماز 271 جۇك كولىگىن، الماتىلىق HyundaiTrans Auto 194 تەحنيكا، ال Daewoo Bus - 117 اۆتوبۋس شىعارعان.

 «برەندتەر تۇرعىسىنان Hyundai ايتارلىقتاي ءوسىمدى كورسەتتى. اتالمىش ماركا بويىنشا «سارى اركااۆتوپروم» كاسىپورنىندا  6972 اۆتوكولىك قۇراستىرىلىپ، وتكەن جىلعىدان قاراعاندا 5 ەسە كوپ وسىمگە قول جەتكىزىلگەن. سونداي- اق، Kia  كولىكتەرىنىڭ ءوندىرىسى 3 ەسەگە ارتىپ، قوستانايلىق JAC ماركالى كولىكتەر دە (1144 اۆتو) ەكى ەسە كوپ شىعارىلعان. Chevrolet ماركالى كولىكتەر دە ەكى ەسە كوپ قۇراستىرىلسا، «ازيا اۆتو» شىعاراتىن Lada 11  كولىگى 244 داناعا جەتىپ 35 پايىزعا وسكەن»، - دەلىنگەن حابارلامادا.

اۆتور: ايان بەكەن ۇلى