تەرىنىڭ قارتايۋىن باياۋلاتاتىن كوللاگەن قوسىلعان 10 ءونىم

 استانا. قازاقپارات - كوللاگەن - دانەكەر ۇلپالارىن بىرىكتىرەتىن اقۋىزدىڭ ءبىر ءتۇرى.

ول تەرىنىڭ يىلگىشتىگى مەن سەرپىمدىلىگى ءۇشىن جاۋاپ بەرەدى. تەرىڭىزدەگى العاش پايدا بولعان اجىمدەر - اعزادا كوللاگەننىڭ تومەندەگەنىن بىلدىرەدى. دۇرىس تاماقتانۋ - وسى اقۋىزدىڭ بۇزىلۋ ءۇردىسىن باياۋلاتۋدىڭ بىردەن- ءبىر ءتاسىلى.

سوندىقتان ەرتە قارتايۋدىڭ الدىن-الۋلارىڭىز ءۇشىن ءسىزدىڭ تاماقتانۋ راتسيونىڭىزدا بولۋعا ءتيىس ازىقتاردىڭ ءتىزىمىن ۇسىنباقپىز. ءبارىن وڭاي تۇسىنۋلەرىڭىز ءۇشىن، الدىمەن «كوللاگەن» ۇعىمىنا انىقتاما بەرە كەتەيىك.

كوللاگەندى «جەلىم» دەپ تە اتايتىنى بەكەر ەمەس، سەبەبى بۇل اقۋىز بولماسا اعزامىز شاشىلىپ قالار ەدى.

اتاپ وتكەنىمىزدەي، كوللاگەن بۇل - اقۋىز. اعزامىزداعى اقۋىزدىڭ 30- 40 پايىزى كوللاگەنگە تيەسەلى. كوللاگەن تەرىنىڭ جاستىعىن ساقتايدى، سونىمەن قاتار ول تىرناق، شاش، بۋىن جانە ىشەك ۇلپاسىندا دا بار. كوللاگەننىڭ 16 ءتۇرى بار. ونىڭ ءۇش ءتۇرى (90 پايىز) كەڭىنەن تارالعان. كوللاگەننىڭ I جانە II تۇرلەرى سۇيەكتە، تەرىدە، ءسىڭىر بايلامدارىندا، ال كوللاگەننىڭ III ءتۇرى - بۋىنداردا بولادى.

ادامنىڭ اعزاسى كوللاگەنىڭ قاجەتتى مولشەرىن ءوزى ءبولىپ شىعارۋعا قابىلەتتى. الايدا، 25 جاستان سوڭ ونىڭ تابيعي ءوندىرىسى تومەندەي باستايدى. مىنە، ءدال وسى كەزدە العاشقى اجىمدەردى بايقاۋعا بولادى. تاعى ءسال ۋاقىتتان كەيىن ارتريت پايدا بولا باستايدى. ولاي بولسا، بۇنىڭ الدىن الۋ ءۇشىن قانداي ازىقتاردى تۇتىنۋ كەرەكتىگىن بىرگە قاراستىرايىق.

ەت سورپاسى جانە بالىق

- سۇيەك سورپاسى - ەڭ جاقسى نۇسقالاردىڭ ءبىرى، سەبەبى باسقا ازىقتار كوللاگەننىڭ ءبولىنۋىن جىلدامداتادى، ال بۇل سورپانىڭ قۇرامىندا اعزا بىردەن قابىلداي الاتىن اقۋىزدىڭ بەلسەندى فورماسى بار. سيىر ەتىنەن جاسالعان سورپا تەرىنىڭ ساۋلىعىنا وڭ اسەر ەتە الاتىن كوللاگەننىڭ I تۇرىنە باي؛ ال بۋىننىڭ دۇرىس قىزمەت اتقارۋىن قامتاماسىز ەتەتىن كوللاگەننىڭ II ءتۇرى كۇركەتاۋىق پەن تاۋىق سورپاسىنىڭ قۇرامىندا بولادى. سۇيەك سورپاسىن تەرىنىڭ ساۋلىعى ءۇشىن كۇندەلىكتى 170-  340 گرامم ءىشىپ تۇرۋ كەرەك.

- ارقان بالىق - بۇل بالىقتىڭ قۇرامىندا كوللاگەننىڭ تۇزىلۋىنە كومەكتەسەتىن مىرىش پەن مينەرالدار، سونداي- اق تەرى جاستىعىن ساقتاپ تۇرۋ ءۇشىن ونى ىشتەي ىلعالداندىرۋعا كومەكتەسەتىن ومەگا-3 مايى بار. ارقان بالىقتى اپتاسىنا 2 پورتسيا (115- 140 گ) جەپ تۇرۋعا كەڭەس بەرەمىز.

جەمىس-جيدەكتەر مەن كوكونىستەر

- جاسىل جاپىراقتى كوكونىستەر - ءار ءتۇرلى اۋرۋلاردىڭ الدىن الۋداعى ەڭ ءتيىمدى كومەكشى. سولاي اق ول كوللاگەننىڭ ۋاقىتىنان بۇرىن ىدىراۋىن توقتاتادى. بارلىق جاسىل كوكونىستەردىڭ قۇرامىندا تەرىدەگى پروكوللاگەننىڭ سانىن ارتتىرۋعا كومەكتەسەتىن حلوروفيلل بار. حلوروفيللدىڭ قۇرامىندا ەرتە قارتايۋدىڭ الدىن الاتىن انتيوكسيدانتتار بولادى. ول تەرىنى ۋلتراكۇلگىن ساۋلەلەر مەن بوس راديكالداردىڭ جاعىمسىز اسەرىنەن قورعايدى. جاسىل كوكونىستەردىڭ كۇندىك پورتسياسى ءسىزدىڭ بەلسەندىلىگىڭىزگە بايلانىستى: كوپ قوزعالىستا بولساڭىز، مولشەرىن ارتتىرا الاسىز. ەگەر بەلسەندىلىگىڭىز تاۋلىگىنە 30 مينۋتتى قۇراسا، ويلانباستان 3 توستاعانىن، ال ەگەر كوپ قوزعالماساڭىز - 2,5 توستاعان جەۋ دە جەتىلىكتى.

- سيترۋس جەمىستەرى. سيترۋستىڭ قۇرامىناعى س دارۋمەنى پروليننىڭ قالىپتاسۋىنا قاجەتتى امين قىشقىلىنىڭ بايلانىستىرۋشى كومپونەنتتەرىنىڭ ءرولىن اتقارادى. پرولين - كوللاگەننىڭ قالىپتاسۋ ساتىسىنداعى ەڭ قاجەتتى زاتتىڭ ءبىرى بولىپ تابىلادى. سونىمەن قاتار س دارۋمەنى تەرىنى قورشاعان ورتاداعى ۋلى زاتتاردان قورعايدى. س دارۋمەنىنىڭ كۇندىك قالىپتى نورماسىن قابىلداۋ ءۇشىن، كۇن سايىن 2 جەمىستەن جەۋ كەرەك.

- قىزاناقتار. قىزاناقتىڭ قۇرامىندا تەرىنى كۇن ساۋلەسىنەن قورعايتىن انتيوكسيدانت - ليكوپين بار. سونىمەن قاتار، ليكوپين كوللاگەن سينتەزىن ىنتالاندىرۋشى ءرولىن اتقارادى. بۇل زاتتى كوبىرەك الۋ ءۇشىن قىزاناقتى جىلۋمەن وڭدەۋ كەرەك، نەمەسە كۇنىنە 1 ستاقان قىزاناق شىرىنىن ءىشىڭىز.

- اۆوكادو. بۇل جەمىستىڭ قۇرامىندا ە دارۋمەنى بار. ول اعزاداعى كوللاگەننىڭ ىدىراۋىن بولدىرماۋعا كومەكتەسەدى. سونداي- اق اۆاكادونىڭ قۇرامىندا تەرى جاسۋشالارىنا قاجەتتى پايدالى ماي بولادى. ول - كوللاگەندەرىڭ تۇزىلۋىنە جاردەمدەسەتىن اۆاكادو مايى. ماماندار بۇل جەمىستىڭ جارتىسىن جەۋگە كەڭەس بەرەدى. دەگەنمەن، اعزاعا قۇلاق ءتۇرىپ، قابىلداعان تاعامعا اسەرىن بايقاپ تۇرۋ كەرەك.

- تاڭقۋراي، قارابۇلدىرگەن، قۇلپىناي، مۇكجيدەك - بۇلار كوللاگەندەردىڭ ۋك ساۋلەلەرى اسەرىنەن ىدىراۋىن توقتاتاتىن، اعزاعا اسا قاجەتتى ەللاگ قىشقىلىنىڭ قاينار كوزى بولىپ تابىلادى. جيدەكتەر سونىمەن قاتار س دارۋمەنىنە باي. ءبىر كۇندىك قابىلداۋ نورماسى ادامنىڭ جاس شاماسىنا قاراي انىقتالادى: ەرەسەك ادامعا (18+) 75 گرامعا دەيىن جەۋگە بولادى.

جۇمىرتقا

ءدال سۇيەك سورپاسى سياقتى جۇمىرتقانىڭ قۇرامىندا دا كوللاگەن بولادى. اعزا ونى جۇمىرتقانىڭ سارىۋىزىنان الا الادى. جۇمىرتقا قۇرامىندا سونداي-اق كۇكىرت بار. ول كوللاگەننىڭ تۇزىلۋىنە وتە قاجەت. سونىمەن قاتار كۇكىرت باۋىردان بولىنەتىن، كوللاگەندەردى بۇزاتىن ۋلى زاتتاردى جويۋعا كومەكتەسەدى. الايدا، ونى شامادان تىس جەۋگە بولمايدى. كۇندىككە - 2 جۇمىرتقا.

دانەكتەر

- اسقاباق دانەگى - كوللاگەن سينتەزىن ىنتالاندىراتىن مىرىشقا باي. قۇرامىندا مىرىش بار تاعامدار اقۋىزدىڭ ىدىراۋىن باسەڭدەتۋگە سەبەبىن تيگىزەدى. سونداي-اق، مىرىش تەرىدەگى جاراقاتتاردىڭ تەز جازىلۋىنا كومەكتەسەدى. تاعام ءۇشىن قۋىرىلعان دانەكتەردى تاڭداۋ كەرەك، سەبەبى وندا پايدالى زاتتار وتە كوپ. سالاتقا دانەكتىڭ 2 اس قاسىعىن قوسىپ جەۋگە كەڭەس بەرەمىز.

- شيدىڭ دانەگى. وسى دانەكتىڭ قۇرامىنداعى وسىمدىكتەن الىناتىن ومەگا-3 مايى تەرىنىڭ جاسارۋىنا جانە تەرى جاسۋشالارىنىڭ ىلعالدانۋىنا كومەكتەسەدى. وسىنىڭ ارقاسىندا تەرى جۇمساق ءارى سەرپىمدى بولادى. ەرەسەك ادامعا كۇنىنە 20 گ دانەك جەۋ جەتكىلىكتى. ونى بوتقاعا، سمۋزي مەن پىسىرەتىن نانعا قوسۋعا بولادى.

تەك دۇرىس تاماقتانۋ عانا ەمەس، سونىمەن قاتار دۇرىس ءومىر سالتى دا ماڭىزدى

وسى تىزىمدەگى تاعامدار كوللاگەن مولشەرىن رەتتەۋگە كومەكتەسە الادى، ءبىراق، ادامنىڭ جاس كورسەتكىشىنە بايلانىستى ەمەس كەيبىر فاكتورلاردىڭ دا اقۋىزدىڭ بولىنۋىنە اسەر ەتەتىنىن ەسكەرە جۇرىڭىزدەر، ولار:

- شىلىم شەگۋ

- لاستانعان قورشاعان ورتا

- كۇن ساۋلەسىنىڭ اسەرى

- رافينادتالعان قانت پەن قۋىرىلعان مايلى تاعامداردى شەكتەن تىس قابىلداۋ

ال ءسىز تەرىڭىزدىڭ ساۋلىعى مەن جاستىعىن ساقتايسىز با؟