بەلدى قورعاۋدىڭ 10 جولى

 استانا. قازاقپارات - بەل اۋرۋى بۇكىل دەنەگە اسەر ەتىپ، ءومىردىڭ ءمانىن كەتىرەتىنى انىق. بۇل دەرتتىڭ الدىن الۋعا كومەكتەسەتىن مامانداردىڭ ماڭىزدى ون كەڭەسى:

ءبىر زاتتى كوتەرەر كەزدە تىزەلەرىڭدى بۇگىڭدەر

قاتە تۇرىستا جۇك كوتەرۋ، بەل اۋرۋىنا سەبەپ بولاتىن ارەكەتتەردىڭ باسىندا كەلەدى. جەردەن ءبىر نارسە الاتىن كەزدە تىزەلەرىڭدى بۇگىپ، جەرگە وتىرىپ، زاتتى سول كۇيدە الىڭدار.

بەلدەرىڭدى اينالدىرماڭدار

اسىرەسە كولىكتە ارقاعا قاراپ ءبىر زاتتى الۋ بەل اۋرۋىنا سەبەپ بولادى. ومىرتقانىڭ اينالىپ قيمىلداۋىنا جول اشاتىن بۇل تيپتەگى قاۋىپتى ارەكەتتەردەن ۇزاق تۇرىڭدار.

ارىقتاڭدار

سالماق قوسۋ بەلدىڭ اينالاسىنداعى ديسكىلەردى قينايدى. بۇكىل دەنەدەگى سالماق بەلدەگى ومىرتقاعا تۇسەدى جانە جۇك سول جەردەن اياقتارعا جايىلادى. ارتىق سالماقتاردان قۇتىلۋ ءۇشىن سالاۋاتتى تۇردە ازىقتانىڭدار جانە جۇيەلى تۇردە جاتتىعۋ جاساڭدار.

بيىككە قاراي سوزىلماڭدار

بەل اۋرۋىنا جول اشاتىن ارەكەتتەردىڭ ءبىرى بيىككە سوزىلۋ جانە بيىك جەردەگى اۋىر جۇكتى الۋمەن پايدا بولادى.

جاتتىعۋ جاساڭدار

بەلدىڭ اينالاسىنداعى بۇلشىق ەتتەردىڭ قۋاتتى بولۋى ءۇشىن جاتتىعۋ جاساڭدار. ءتۇزۋ جۇگىرۋ جانە ءجۇزۋ ەڭ كوپ كەڭەس بەرىلگەن سپورتتاردىڭ ءبىرى بولىپ تابىلادى. باسكەتبول، فۋتبول نەمەسە اۋىر اتلەتيكا سياقتى سپورتتار بەلى اۋىراتىن ادامدارعا ۇسىنىلمايدى.

قيمىل-قوزعالىسسىز بولماڭدار

كومپيۋتەردىڭ باسىندا ءار جارتى ساعاتتا تۇرىپ، 5-6 مينۋت ءجۇرىپ قايتىڭدار. بۇل ءبىر جەردە وتىرىپ جۇمىس ىستەيتىندەرگە دە قاتىستى.

سۇيەنىش قولدانىڭدار

جۇمىس ورنىندا نەمەسە كولىككە وتىرعاندا مىندەتتى تۇردە بەلگە سۇيەنىش بولاتىن ءبىر جاستىقشا قويىڭدار. كولىك ايداعان كەزدە ارتقا قاتتى سۇيەنبەي، رۋلگە جاقىن وتىرىڭدار.

جاتىپ كىتاپ وقىماڭدار

كىتاپتى جاتىپ وقۋ بەل اۋرۋىنا جول اشادى. العا قاراي يىلگەندىكتەن ومىرتقانىڭ قالپى وزگەرەدى. ءدال سول سياقتى توسەكتە نوۋتبۋكپەن جۇمىس ىستەمەڭدەر.

توسەك تاڭداۋعا ءمان بەرىڭدەر

توسەك قاتتى دا، جۇمساق تا بولماۋ كەرەك. ورتوپەديالىق ەرەكشەلىگى بار توسەكتەر بەلدىڭ ساۋلىعىن ساقتايدى.

اياق كيىمدەرىڭ اياقتارىڭدا ەركىن تۇرسىن

اسىرەسە ايەلدەردىڭ ۇزاق ۋاقىت بيىك وكشەلى اياق كيىم كيىپ جۇرۋلەرى قاۋىپتى بولۋى مۇمكىن. ويتكەنى بۇكىل ومىرتقانىڭ اۋىرلىق ورتالىعى وزگەرەدى. بۇكىل سالماق بەلگە تۇسەدى.