الماتىدا 10 جاڭا مۋرال پايدا بولادى

استانا. قازاقپارات - الماتىعا وڭتۇستىك- شىعىس ازيادان Kenji Chai اتتى سۋرەتشى قالانىڭ جاڭا مۋرالدار توپتاماسىنا ۇلەس قوسۋ ءۇشىن ۇشىپ كەلدى. بۇل تۋرالى الماتى اكىمشىلىگىنىڭ باسپا ءسوز قىزمەتى حابارلايدى.

سۋرەتشى الماتىداعى III حالىقارالىق MURAL FEST ءۇي قابىرعالارىنا سالىناتىن سۋرەتتەر فەستيۆالىنە العاش قاتىسىپ جاتىر. Kenji Chai - مالايزياداعى ەڭ بيىك مۋرالدىڭ (87,1 مەتر) اۆتورى. سۋرەتشى جاڭا تۋىندىسىن اۋەزوۆ اۋدانى، مامىر-3 ىقشام اۋدانىنداعى 9 قاباتتى ۇيگە سالادى.

«مەن ءوز مۇمكىندىكتەرىمدى بارىنشا شەبەر كورسەتكىم كەلەدى. الماتى - وتە سۇلۋ مەگاپوليس، مەن ءوز جۇمىسىم ارقىلى وسى المالى قالانىڭ رۋحىن بەينەلەگىم كەلەدى»، - دەيدى Kenji Chai.

الماتى كۇنىنە وراي ۇيىمداستىرىلىپ جاتقان MURAL FEST اياسىندا تاعى 10 ءۇيدىڭ قابىرعاسىنا سۋرەت سالۋ جوسپارلانعان. بۇعان دەيىنگى 2 جىل ىشىندە الماتىداعى 17 كوپ قاباتتى ۇيگە مۋرال سالىنعان ەكەن.

Kenji Chai
بيىلعى فەستيۆالگە ۋكراينا، رەسەي، مالايزيا، تۇركيا، ۇلىبريتانيادان ونداعان بەلگىلى سۋرەتشى قاتىسىپ جاتىر.

اندرەي كراۆچەنكو، الماتى
ءبىرىنشى بولىپ دەكوراتيۆتى كوركەم سۋرەتتى ۋكراينالىق اندرەي كراۆچەنكو بوستاندىق اۋدانىنداعى تيميريازيەۆ- جاروكوۆ كوشەلەرىنىڭ قيىلىسىنداعى عيماراتقا سالدى.

كەيىن رەسەيلىك ZUKCLUB كومانداسى ىسكە كىرىستى. ولار اباي قۇنانباي ۇلى مەن احمەت بايتۇرسىن ۇلىنىڭ سۋرەتتەرىن اباي (117 ءۇي) مەن بايتۇرسىن ۇلى كوشەلەرىندە سالىپ جاتىر.

Massaget.kz