مۋزىكا فەستيۆالى: ۇلىتاۋدا 10 ەلدىڭ ونەرپازدارى باس قوستى
فولكلورلىق مۋزىكاعا ارنالعان كەش ارنايى ازىرلەنگەن ەتنواۋىلدا ۇيىمداستىرىلدى، دەپ حابارلايدى قازاقپارات ءتىلشىسى.
حالىقارالىق فەستيۆال «رۋحاني جاڭعىرۋ» باعدارلاماسىنىڭ «قازاقستاننىڭ كيەلى جەرلەرى» جانە «تۋعان جەر» ارنايى جوباسى نەگىزىندە ۇيىمداستىرىلعان. شاراعا مەكسيكا، پەرۋ، پولشا، رەسەي، تۇركيا، تاجىكستان، فرانسيا، شوتلانديا، جاپونيا مەن قازاقستاننان 11 فولكلورلىق ۇجىم قاتىستى.
«جەزكيىك» جىل سايىن وتەتىن حالىقارالىق فەستيۆالگە اينالاتىنىنا سەنەمىز. شارا ءساتتى جالعاسسىن دەپ تىلەيمىز. قاتىسۋشىلاردىڭ بارلىعى ءبىر-بىرىمەن جاقىن تانىسىپ، كەشتەن ۇمىتىلماس اسەر الدى»، - دەدى ءداستۇرلى فرانسۋز اندەرىن ورىنداۋشى Nice La Belle توبىنىڭ مۋزىكانتتارى.
«جەزكيىك» فەستيۆالىنىڭ قاتىسۋشىلارىن ارنايى قۇتتىقتاۋ ءۇشىن ق ر مادەنيەت جانە سپورت ءمينيسترى ارىستانبەك مۇحامەدي ۇلى، «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ، قاراعاندى وبلىسىنىڭ اكىمى ەرلان قوشانوۆ، ق ر مەملەكەتتىك جانە اسكەري قايراتكەرى مۇحتار التىنبايەۆ، قازاقستاننىڭ حالىق قاھارمانى توقتار اۋباكىروۆ، قازاقستاننىڭ حالىق ارتىستەرى بيبىگۇل تولەگەنوۆا مەن نۇرجامال ۇسەنبايەۆا جانە ت. ب. كەلدى.
ارىستانبەك مۇحامەدي ۇلى ەلباسى نۇرسۇلتان نازاربايەۆتىڭ اتىنان قۇتتىقتاۋ ءسوز سويلەدى.
«مەن ءۇشىن مۇنداي اۋقىمدى شاراعا قاتىسۋ - زور مارتەبە. قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ جولداعان قۇتتىقتاۋىن وقۋعا رۇقسات ەتىڭىزدەر.
«قۇرمەتتى حانىمدار مەن مىرزالار! سىزدەردى «جەزكيىك» 1- حالىقارالىق مۋزىكا فەستيۆالىنىڭ اشىلۋ سالتاناتىمەن قۇتتىقتايمىن! «رۋحاني جاڭعىرۋ» باعدارلاماسى اياسىندا ءوتىپ جاتقان بۇل شارا ەلىمىزدىڭ مادەني سالاسىندا ەلەۋلى ورىن الاتىنا سەنەمىن. سونداي-اق، قازاق حالقىنىڭ فولكلورلىق ونەرىن بۇكىل الەمگە تانىتادى دەگەن ويدامىن»، - دەگەن ەلباسىنىڭ ءسوزىن جەتكىزدى قازاقستاننىڭ مادەنيەت جانە سپورت ءمينيسترى.
فەستيۆال سوڭىندا قاراعاندى وبلىسىنىڭ حورەوگرافيالىق ۇجىمدارىنىڭ بيشىلەرى قوناقتار ءۇشىن قازاقتىڭ ۇلتتىق ءبيى «قارا جورعانى» بيلەدى. مۋزىكالىق كەش «ۇلىتاۋ» توبىنىڭ ورىنداۋىنداعى انمەن اياقتالدى.