استانادا 10 -قاباتتان قۇلاۋعا شاق قالعان بالالاردى «گازەل» جۇرگىزۋشىسى قۇتقارعان
ءدۇيىم جۇرتتىڭ كوزىنشە بولعان وقيعانى قازاقپارات تىلشىسىنە كۋاگەر جايىپ سالدى.
«وقيعاعا كۋا بولعان بارلىعىمىز قاتتى قورىقتىق. قازىر ەسىمە السام، جۇرەگىم جارىلىپ كەتە جازدايدى. تەرەزەنىڭ الدىنداعى تاقتايشادا تۇرعان بالالاردى جولدىڭ بويىمەن ءوتىپ بارا جاتقان «گازەلدىڭ» جۇرگىزۋشىسى بايقاپ، بىردەن دابىل قاعا باستادى»، - دەدى كۋاگەر قىز.
ول ەسىمىن اتاماۋدى ءوتىندى.
قىزدىڭ ايتۋىنشا، بالالاردىڭ جاستارى شامامەن - 4-5-تە. شالقاسىنان اشىق جاتقان تەرەزەنىڭ الدىنداعى تاقتايشادا ويناپ جۇرگەن. تومەندە تۇرعان ادامدار سابيلەردىڭ ءبىرى ەكىنشىسىن ارتتان يتەرىپ جىبەرەدى دەپ قورىققان.
«بارلىعىمىز داۋسىمىزدى بارىنشا قاتتى شىعارىپ، ولاردان تەرەزەدەن ءتۇسىپ، ۇيگە كىرۋلەرىن وتىندىك. قاتتى ايعايلاعانىم سونشالىق، ءالى كۇنگە داۋسىمدى قالپىنا كەلتىرە الماي ءجۇرمىن. الايدا، بالالار ءبىزدىڭ شۋ شىعارعانىمىزعا ودان سايىن قىزىعىپ، تومەنگە قاراي بەردى»، - دەپ كۋاگەر قىز وقيعا ورنىنا قۇتقارۋشىلار كەلگەنگە دەيىنگى جاعدايدى ەسكە الادى.
سونداي-اق، كۋاگەر كەز كەلگەن بالانىڭ تەرەزەدەن قۇلاۋىنا سەبەپ بولاتىن بيىك قاباتتى ۇيلەردەگى اقاۋلاردى اتادى.
«بۇل جەرلەردە ادامداردىڭ باسىم كوپشىلىگى پاتەر جالداپ تۇرادى. ال جالعا بەرۋشىلەر تەرەزەلەرگە تور ورناتۋدى ويلامايدى، سەبەبى ول دا - شىعىن»، - دەدى وقيعا كۋاگەرى.
ەسكە سالايىق، قالالىق توتەنشە جاعدايلار دەپارتامەنتىنىڭ قىزمەتكەرلەرى 10 -قاباتتىڭ تەرەزەسىنىڭ الدىنداعى تاقتايشادا ويناپ جۇرگەن ەكى بالانى قۇتقارىپ، امان الىپ قالعان بولاتىن. قۇتقارۋشىلار كەلگەنگە دەيىن كورشىلەر بالالاردى قولدا بار قۇرالدار ارقىلى ۇستاپ تۇرعان.