ايىنا 10 مىڭ تەڭگە: اۋىلدا ارزان باسپانا الۋدىڭ شارتتارى قانداي بولادى
اتالعان شارتتار «نۇرلى جەر» مەملەكەتتىك باعدارلاماسىنىڭ بولىك ءبىر باعىتى رەتىندە ەنگىزىلۋى مۇمكىن، دەپ حابارلايدى قازاقپارات ءتىلشىسى.
قۇرىلىس جانە تۇرعىن ءۇي - كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆتىڭ ايتۋىنشا، جەرگىلىكتى جەردە جاس ماماندارعا جاعداي جاساۋ قاجەت. ونسىز اۋىل شارۋاشىلىعىن كوتەرۋ مۇمكىن ەمەس. «مىسالى، قازىر «ديپلوممەن اۋىلعا» سياقتى باعدارلامالار بار عوي. سونىڭ اياسىندا مۇعالىمدەرگە، دارىگەرلەرگە، ۆەتەرينارلارعا ءۇي الۋ ءۇشىن 2,5 ميلليون تەڭگەدەن بەرىپ جاتىر. اۋىلدى جەردە دە باسپانا سالۋ كەرەك دەپ، قايتا-قايتا ايتىپ جاتقاننان كەيىن ءبىز ءتيىستى جۇمىستى باستاپ كەتتىك. ءۇيدى ساتىپ الاتىن ادام بولسا، وندا كوممەرتسيالىق تۇرعىن ءۇيدى اۋىلعا جىبەرسەك دەگەن ويىمىز بار. بۇل بولەك باعدارلاما ەمەس، «نۇرلى جەر» باعدارلاماسىنىڭ ءبىر باعىتى بولاتىن شىعار»، - دەدى م. جايىمبەتوۆ قازاقپارات تىلشىسىنە بەرگەن سۇحباتىندا.
ونىڭ سوزىنە قاراعاندا، اۋىلدى جەرلەردە باسپانا سالۋ ارزان شارۋا ەمەس. سەبەبى الدىمەن ينجەنەرلىك جەلىلەردى تارتۋ قاجەت. اتالعان جۇمىس بيۋدجەتتىڭ ەسەبىنەن اتقارىلادى. ودان كەيىن تۇرعىن ءۇي قۇرىلىسى بار. سونىڭ بارىنە قىرۋار قارجى كەتەدى. ال بيۋدجەت قاراجاتى قايتارىمدى نەگىزدە بەرىلۋ شارت.
«سوندىقتان ءبىز وسى جاعىن قارايمىز. ءۇيدى ۇزاق مەرزىمگە جالعا بەرىپ، ارتىنان جەكە مەنشىككە ساتىپ الۋ قۇقىعىن ەنگىزەتىن شىعارمىز. بالكىم، ايىنا 10-20 مىڭ تەڭگەدەن تولەپ تۇراتىنداي ۇزاق مەرزىمگە ىستەيمىز. سوندا قالتاعا كوپ سالماق تۇسپەيدى. ءبىراق ول قايتارىمدى اقشا بولۋى كەرەك. «تەگىن باسپانا» دەگەن بولمايدى. سەبەبى بىزدە نارىقتىق جۇيە. قالاي بولسا دا، 3 ميلليونعا الدى ما، 5 ميلليونعا الدى ما، ايتەۋىر، 20-25 جىلدىڭ ىشىندە قايتارىپ بەرەتىندەي ءبىر مەحانيزمدى ويلاپ تابۋىمىز قاجەت. نەگىزى، ۇكىمەت قولداسا، دەپۋتاتتار قولداپ جاتسا، اتالعان باستامانى قابىلدايمىز دەگەن ويىمىز بار. ويتكەنى وعان دا ءبىراز قارجى قاجەت»، - دەپ اتاپ كورسەتتى م. جايىمبەتوۆ.
ايتا كەتەيىك، ق ر ينۆەستيسيالار جانە دامۋ ۆيتسە- ءمينيسترى قايىربەك وسكەنبايەۆ اۋىلدارعا ارنالعان جەكە تۇرعىن ءۇي باعدارلاماسىن ازىرلەۋدى ۇسىنعان بولاتىن. ماجىلىستەگى «نۇرلى جەر» تۇرعىن ءۇي قۇرىلىسى باعدارلاماسىن ىسكە اسىرۋ بارىسى» تاقىرىبىندا وتكەن دوڭگەلەك ۇستەل بارىسىندا دەپۋتاتتار ءبىرىنشى رەت ءۇي ساتىپ الۋ بويىنشا مەملەكەتتىك باعدارلامانىڭ تالاپتارى اۋىلدىق جەرلەردىڭ تۇرعىندارى ءۇشىن جارامايتىندىعىن ايتقان بولاتىن.
«اۋىلعا قاتىستى وتە دۇرىس ايتىپ وتىرسىزدار. وتكەن جولعى وتىرىستا دا، جالپى ۇنەمى ايتىپ كەلەمىن اۋىلدارعا قاتىستى ايرىقشا ۇستانىم بولۋى كەرەك. ءبىز اۋىلدىق جەرلەردەگى تۇرعىن ۇيلەرگە قاتىستى جاڭا باعدارلاما ازىرلەۋىمىز كەرەك. ۇكىمەتتەگى تالقىلاۋ بارىسىندا دا بۇل ماسەلەنى كوتەرگەنمىن. قازىر ەكى تەتىگى ءبىرشاما تۇسىنىكتى بولا ءتۇستى. وسى ايدا ءبىز ونى اياقتاپ، ودان كەيىن كەلىسۋگە جىبەرەتىن شىعارمىز. قازىرگى ۋاقىتتا «نۇرلى جەر» جانە «7-20-25» اياسىندا پايدالانىپ جۇرگەن باعدارلامالار اۋىلدىق جەرلەر ءۇشىن جارامسىز ەكەندىگى انىق»، - دەپ اتاپ كورسەتتى ق. وسكەنبايەۆ.