ساسىق اۋىزسۋ تۋرالى اكىم: ماسەلە 10 جىلدان بەرى كوتەرىلىپ كەلەدى
قوستاناي تۇرعىندارى كوممۋنالدىق كاسىپورىنداردىڭ جۇمىستارىن سىنعا الدى. ولار اكىمدىكتەن اۋىزسۋدىڭ ساپاسىن ۇنەمى قاداعالاپ تۇرۋدى سۇرايدى. سونداي-اق، قىس ورتاسىنان باستاپ اۋىز سۋدىڭ ءتۇسى سارعىش تارتىپ، جاعىمسىز ءيىس شىعىپ، ءدامى وزگەرىپ كەتكەندىگىن جەتكىزدى.
«راسىن ايتۋ كەرەك، اۋىز سۋ ساپاسى ناشار. تات باسقان ىستىق سۋ مەن حلوردىڭ ءيىسى شىعىپ تۇراتىن سالقىن سۋدى قالاي پايدالانامىز؟ سۋ قالىپقا كەلگەنشە شۇمەكتى بىرنەشە ۋاقىت بويى اشىپ قويۋ كەرەك. ال، بوسقا اعىپ تۇرعان سۋدىڭ اقشاسىن كىم تولەيدى؟ اكىمدىكتەن كەزەكشىلىك ۇيىمداستىرىپ، كوممۋنالدىق مەكەمەلەردىڭ جۇمىستارىن باقىلاۋلارىڭىزدى سۇرايمىز»، - دەدى قالا تۇرعىنى ۆلاديمير زاحارچەنكو.
تۇرعىننىڭ ساۋالىنا جاۋاپ بەرگەن وبلىس اكىمى ارحيمەد مۇحامبەتوۆ تاياۋدا سۋ تازارتقىش ستانساسىنىڭ ورناتىلاتىنىن ايتتى.
«اۋىز سۋدىڭ ساپاسى تۋرالى قالا تۇرعىندارىنىڭ ايتىپ جۇرگەن سوزدەرىن جوققا شىعارا المايمىز. ءيا، سۋدىڭ تۇسىندە دە، دامىندە دە وزگەرىس بار. ءبىراق، بۇل ماسەلە ونداعان جىل بويى كوتەرىلىپ كەلەدى. سەبەبى، قوستاناي قالاسى اۋىز سۋدى سۋ قويماسىنان الادى. بيىلدان باستاپ بۇل ماسەلە شەشىلۋى ءتيىس. وسى ۋاقىتقا دەيىن ەسكى سۋ سورعىشتار مەن قۇبىرلاردى پايدالانىپ كەلدىك. ەندى زاماناۋي سۋ تازارتقىش ستانساسىن ورناتۋدى جوسپارلاپ وتىرمىز. وعان بيۋدجەتتەن 4 ميلليارد تەڭگە قاراستىرىلعان. الداعى جارتىجىلدىقتا جوبالىق- سمەتالىق قۇجاتتارى ازىرلەنەدى. كەيىن جوبانى ارنايى ساراپتامادان وتكىزەمىز»، - دەپ ءتۇسىندىردى وبلىس اكىمى.
جيىندا بەلگىلى بولعانداي، اۋىزسۋ اقىسىن تولەۋ جولى جەڭىلدەندى. ويتكەنى، ورتالىقتاعى ءال-فارابي كوشەسىندە ءبىرىڭعاي كوممۋنالدىق تولەم ورتالىعى اشىلدى. مۇنداي ورتالىقتار باسقا دا مولتەك اۋدانداردا ورنالاستىرىلادى.