گاۋحار الدامبەرگەنوۆا: جولداۋداعى 10 نەگىزگى مىندەت - جەتىستىككە جەتۋ جولىنداعى ماڭىزدى قادام
بۇل پىكىردى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى، پەداگوگيكا عىلىمدارىنىڭ دوكتورى، پروفەسسور گاۋحار الدامبەرگەنوۆا ءبىلدىردى، دەپ حابارلايدى قازاقپارات.
«مەملەكەت باسشىسى نۇرسۇلتان نازاربايەۆتىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا ارناعان جولداۋى جاڭا الەمگە ءھام ءتورتىنشى ونەركاسىپتىك ريەۆوليۋتسيا الەمىنە بەيىمدەلۋ مەن جەتىستىككە جەتۋ جولىن تابۋ ءۇشىن نەندەي جۇمىستار ىستەلۋى قاجەتتىگىن ايقىنداۋ جولىنداعى ماڭىزدى ءارى ايتۋلى قادام. ەلباسى جاريالاعان باسىمدىقتار مەن مىندەتتەر قازاقستاننىڭ الەۋمەتتىك-ەكونوميكالىق جانە تەحنولوگيالىق تۇرعىدا جاڭعىرتۋدىڭ لوگيكالىق جالعاسى ىسپەتتەس. ەلىمىز ەگەمەندىك جىلدارىندا ۇنەمى جاھاندىق جاڭا ۇردىستەردى قولداپ كەلەدى. ماقسات - ايقىن. حالىقتىڭ ءال-اۋقاتى مەن تۇرمىستىق الەۋەتىن ارتتىرۋ»، - دەدى ول.
ۋنيۆەرسيتەت باسشىسىنىڭ ايتۋىنشا، ادامي كاپيتالدىڭ ساپاسىن ارتتىرۋ - مەملەكەت دامۋىن قامتاماسىز ەتۋدىڭ نەگىزگى العى شارتى. قوعامنىڭ زياتكەرلىك الەۋەتىن ىلگەرىلەتۋدى جۇزەگە اسىرۋ پەداگوگ كادرلارعا تىكەلەي بايلانىستى. وسى ورايدا ەلباسى جولداۋدىڭ جەتىنشى نەگىزگى مىندەتىندە ءبىلىم بەرۋ جۇيەسىنىڭ بارلىق دەڭگەيى زامان شىندىعى مەن ەكونوميكا سۇرانىستارىنا جاۋاپ بەرۋى ءتيىس ەكەندىگىن جانە بۇل ارادا مۇعالىم ماماندىعىنىڭ بەدەلىن ارتتىرۋ قاجەتتىگىن العا تارتتى.
«بۇل ءۇشىن نە ىستەۋ كەرەك؟ بىرىنشىدەن، وتاندىق جوعارى وقۋ ورىندارى وي-ءورىسى دامىعان، تالانتتى، زەردەلى جانە ۇلتجاندى ۇستاز دايىنداۋدى ودان ارمەن جاڭا دەڭگەيگە كوتەرە ءتۇسۋ قاجەت. سەبەبى، جاڭا مىڭجىلدىقتا ءوز كاسىبىنىڭ قىر سىرىن جەتە مەڭگەرگەن مامانداردىڭ ءباسى باسىم بولماق. بۇنى ۋاقىتتىڭ ءوزى ايقىنداپ وتىر. وسىناۋ اۋقىمدى جاۋاپكەرشىلىكتى ابىرويمەن اتقارۋ پەداگوگتارعا جۇكتەلگەن مارتەبەلى مىندەت. دامۋدىڭ داڭعىل جولىنا باعىت العان بولاشاعى باياندى ەلدىڭ ءورىسى قاشاندا بىلىكتى دە سانالى ۇرپاعىمەن كەڭەيمەك.
وسكەلەڭ جاستى ەلىمىزدىڭ تۇتقاسى، قاتارىنىڭ كوشباسشىسى ەتىپ تاربيەلەۋ - عاسىرعا جۋىق ۇزدىكسىز مۇعالىم ماماندارىن دايارلاپ كەلە جاتقان قىزدار ۋنيۆەرسيتەتىنىڭ باستى باعدارى، نەگىزگى ميسسياسى. ەكىنشىدەن، پرەزيدەنت جوعارى ءبىلىم بەرۋ ىسىندە جاساندى ينتەللەكتپەن جانە «ۇلكەن دەرەكتەرمەن» جۇمىس ىستەۋ ءۇشىن اقپاراتتىق تەحنولوگيالار بويىنشا ءبىلىم العان تۇلەكتەر سانىن كوبەيتۋ تيىستىگى جايىندا، وقىتۋشىلاردىڭ قايتا دايارلىقتان وتۋىنە كۇش سالىپ، جوعارى وقۋ ورىندارىنا شەتەلدىك مەنەدجەرلەردى تارتۋدى ايتتى.
سونىمەن قاتار، قازاقستاندىق جوعارى وقۋ ورىندارى شەتەلدەردىڭ جەتەكشى ۋنيۆەرسيتەتتەرىمەن، عىلىمي ورتالىقتارىمەن، ءىرى كاسىپورىندارىمەن جانە ترانسۇلتتىق كورپوراتسيالارىمەن بىرلەسكەن جوبالاردى بەلسەندى تۇردە جۇزەگە اسىرۋ قاجەتتىگىن العا تارتتى. ءبىزدىڭ ويىمىزشا، ەلباسى جۇكتەگەن مىندەتتەردى جوعارى دارەجەدە ورىنداۋ ءۇشىن مۇعالىمنىڭ مارتەبەسىن كوتەرە تۇسكەن ابزال. بۇل وسى اتالعان مىندەتتەردىڭ ورنىقتى ىسكە اسۋىنا ۇيىتقى بولماق. سونداي- اق، پەداگوگتاردىڭ كاسىبي بىلىكتىلىگىن زاماناۋي تەحنولوگيالار ارقىلى كوتەرۋگە دە باستى نازار اۋدارعان ابزال»، - دەدى گاۋحار الدامبەرگەنوۆا.
ونىڭ پايىمىنشا، بىلىكتى، ءبىلىمدى كادرلار دايارلاۋدا جانە تەحنولوگيالىق دامىعان ەلدەردەگى عىلىمي جۇمىستار جۇيەسىندە جوعارى وقۋ ورىندارىنىڭ ۇلكەن ماڭىزدى ءرول اتقارادى. بۇل تۇرعىدا قازاق مەملەكەتتىك قىزدار پەداگوگيكالىق ۋنيۆەرسيتەتى عىلىم مەن ءبىلىمدى ءوزارا ۇيلەستىرىپ، عىلىمي زەرتتەۋ جۇمىستارىن عىلىم مەن تەحنولوگيانىڭ جاڭا نىساندارىنا باعىتتاپ جۇرگىزۋدى باستى ماقسات ەتىپ كەلە جاتىر. ءبىلىم مەن عىلىمدى دامىتۋ جانە قىزدارعا پەداگوگيكالىق ءبىلىم بەرۋ، بەلسەندى ازاماتتىق ۇستانىمى بار ماماندار دايارلاۋ باستى ميسسياسى بولىپ تابىلاتىن وقۋ ورنىندا وتكىزىلەتىن حالىقارالىق دەڭگەيدەگى عىلىمي كونفەرەنسيالار، جۇزەگە اسىپ جاتقان ءتۇرلى جوبالار سالاداعى ماسەلەلەردى شەتەلدىك ارىپتەستەرمەن بىرلەسە شەشىپ، تاجىريبە الماسۋعا مۇمكىندىك بەرەدى.
«مەملەكەت باسشىسى ۇسىنعان ەلىمىزدى ءتورتىنشى ونەركاسىپتىك ريەۆوليۋتسيا جاعدايىندا دامىتۋعا ارنالعان 10 نەگىزگى مىندەت قازاقستان دامۋىنىڭ جاڭا باعىتىن كوزدەيدى. بۇل بۇگىنگىدەي الماعايىپ ۋاقىتتا قوعامنىڭ مۇددەسى مەن نەگىزگى ماقساتىن ەسكەرەتىن ستراتەگيالىق تۇرعىدان ماڭىزدى قۇجات. سەبەبى، جولداۋدا كورسەتىلگەن باسىمدىقتار ەل دامۋى مەن تۇراقتىلىعىن قامتاماسىز ەتەتىن ۇزاق مەرزىمدى دامۋ ستراتەگياسىنا سايكەس كەلەدى. سونىمەن قاتار، جولداۋ قازاقستاننىڭ الەمدەگى تەحنولوگيالىق، ەكونوميكالىق جانە الەۋمەتتىك سالالارداعى تەرەڭ جانە قارقىندى وزگەرىستەرگە بەيىمدەلۋىنە سەپ بولادى»، - دەپ تۇيىندەدى ءسوزىن ۋنيۆەرسيتەت باسشىسى.
اۆتور: مارلان جيەمباي