بالانىڭ بويىندا باتىلدىقتى قالىپتاستىراتىن 10 قاعيدا

نۇر-سۇلتان. قازاقپارات - «ەل بولام دەسەڭ بەسىگىڭدى تۇزە» دەمەكشى، كەز- كەلگەن تۇلعانىڭ تۇلعالىق قاسيەتتەرى بەسىكتەن باستاۋ الادى. ال يسلام ءدىنى قارشادايىنان باستاپ، ۇل بالانىڭ بويىنا باتىرلىق پەن قاجىرلىلىق، جاۋاپكەرشىلىك پەن اماناتشىلدىق، سەرتىنە بەرىكتىك پەن باۋىرمالدىق سياقتى ۇلى سيپاتتاردى ءسىڭىرۋدىڭ قاعيدالارىن ۇسىنادى،

دەپ جازادى asylarna.kz.

1.بالامەن سويلەسكەندە نەمەسە ونى ەركەلەتكەندە دۇرىس اتتارمەن اتاۋ.

بالا ءوزىن جاسىنان ەرەسەك سەزىنىپ، جاۋاپكەرشىلىك سەزىمىن ءتۇسىنىپ وسكەنى ابزال. بالانى ەركەلەتكەن كەزدە ونى تومەندەتەتىن جامان، لاقاپ ات نەمەسە قىسقارعان اتپەن اتاماي، ۇلتتىق مەنتاليتەت پەن يسلامي قاعيداتقا ساي پالەنشەنىڭ اپەكەسى، پالەننىڭ اعاسى دەگەن سياقتى جاعىمدى اتتار مەن اتاۋ كەرەك. سوندا بالانىڭ ءوز- وزىنە دەگەن باعاسى ارتىپ، سانا- سەزىمى جوعارىلاپ، ءوزىنىڭ ەرەسەكتەرگە ۇقسايتىنىن سەزىنەدى.

2. بالالاردى قوناق كەلگەندە ەرەسەكتەرمەن بىرگە وتىرعىزۋ. بۇل بالالاردىڭ زەرەكتىگى مەن زياتكەرلىگىن ارتتىرىپ، ەرەسەكتەردەن ۇلگى الۋعا مۇمكىندىك بەرەدى جانە ولاردىڭ ويىن مەن ەرمەككە شەكتەن تىس بەرىلىپ كەتۋىن تەجەيدى.

3. بالالارعا اتا- بابامىزدىڭ ەلىن قورعاعان ەسىل ەرلىگى جانە يماندىلىق قاسيەتتەرى جايلى اڭگىمەلەردى قۇلاعىنا قۇيىپ ءوسىرۋ. مىنە، وسىلايشا بالا جۇرەگىندە شىنايى ەلىكتەۋگە تۇرارلىق يدەال تۇلعانىڭ بەينەسىن قالىپتاستىرۋ. بۇل بالالاردىڭ ەرجۇرەك بولىپ وسۋىنە قاجەتتى باتىلدىق سەزىمىن ۇيالاتىپ، تاربيەلەيدى.

4. كوپشىلىك ورتادا بالانى جاسىتپاي، لايىقتى قۇرمەت كورسەتۋ.

5. بالالاردى نىسانا اتۋ، ءجۇزۋ، اتقا ءمىنۋ، كۇرەسۋ، ات بايگەسى سياقتى ەرلەر سپورتىنا باۋلۋ.

6. ەر بالانى نازىكتىك پەن ايەل تابيعاتىنا ءتان سيپاتتاردان اۋلاق ۇستاۋ.

ەردىڭ ايەلگە، ايەلدىڭ ەرگە ۇقساۋى شاريعاتتا حارام نارسە بولىپ سانالادى. سوندىقتان، بالانىڭ قىلىعى، كيىمى ايەل زاتىنا ۇقساپ كەتۋىنەن بارىنشا ساقتانۋ كەرەك.

7. بالاعا ءوزىنىڭ ماڭىزدىلىعىن سەزىنۋگە مۇمكىندىك بەرۋ، ونى باسقالار الدىندا كەمسىتۋدەن ساقتانۋ.

باسقا ۇلكەن ادامدارمەن امانداسقان سياقتى بالالارعا دا سالەم بەرۋ، ولاردىڭ وزگە ەرەسەك ادامدارمەن تەڭ دارەجەدەگى ادام ەكەنىن سەزىندىرىپ، مەنىڭ دە قوعامعا قاجەتىم بار ەكەن عوي دەگەن تۇسىنىك قالىپتاستىرىپ، ومىردەن ءوز ورنىن تابۋعا جەتەلەيدى.

ەكىنشىدەن، بالامەن اقىلداسىپ، كەڭەسۋ جانە ولاردىڭ پىكىرىمەن ساناسۋ. مىنە، وسىلاي ەتكەندە، بالا وزىنە كوڭىل بولىنگەنىن بىلەدى. بۇل دا ءوز كەزەگىندە بالاعا ۇلكەن رۋحاني دەمەۋ بەرەدى.

ۇشىنشىدەن، جاسى مەن مۇمكىندىكتەرىن ەسكەرىپ، جاۋاپتى ىستەردى ورىنداۋعا بۇيىرۋ. سەبەبى، بالا وسىنداي ىستەردى ورىنداۋ ارقىلى ۇيرەنەدى، پىسەدى، كەمەلدەنەدى.

تورتىنشىدەن، قۇپيالاردى سەنىپ تاپسىرۋ.

8. كەرەك كەزدە بالانى باتىلدىق تانىتۋعا، سونداي- اق، حالىق الدىندا ءسوز سويلەۋگە ۇيرەتۋ. بالا جاستايىنان كوپشىلىك الدىندا سويلەپ ۇيرەنسە، جاسقانشاقتىق پەن جاسىقتىقتان ادا بولىپ، قانداي جەردە بولماسىن قىسىلماي ويىن ايتا الاتىن، باتىل، شەشەن بولىپ ەسەيەدى.

9. بالانى شەكتەن شىققان ءسان- سالتانات، جايلىلىق، جالقاۋلىق، جۇمىسسىزدىقتان اۋلاق ۇستاۋ.

10. بالانى ماقساتسىز كەزدەسۋلەر، قاجەتسىز ويىن- ساۋىقتار مەن پايداسىز باسقوسۋلاردان اۋلاق بولۋعا ۇيرەتىڭىز. سەبەبى، بۇلار ەرلىك جانە بايسالدىلىق قاسيەتتەرىنە قايشى كەلەتىن ىستەر بولىپ تابىلادى. ۋاقىتتى قاجەتسىز بوس نارسەلەرگە جۇمساپ ۇيرەنگەن بالا ومىرلىك ماڭىزدى ىستەردە تياناقسىز بولىپ شىعادى. ويتكەنى، ول شىنايى ماڭىزدى نارسە مەن ماڭىزسىز نارسەنىڭ ايىرماسىن سەزىنۋ قابىلەتىنەن ايىرىلادى.

مىنە، تىلىمىزگە تيەك ەتكەن وسىنداي نارسەلەردىڭ بارلىعى ۇرپاق تاربيەسىندە اسا ماڭىزدى. ەرتەڭىمىزدى ويلاساق، بولاشاق ۇرپاعىمىزدى ەزدىكتەن ادا ەتىپ، ەرلىككە باۋليىق، باۋىرلار!