ەلوردادا شەتەلدەن ۇشىپ كەلگەن 108 ادام كارانتينگە جاتقىزىلدى

نۇر-سۇلتان. قازاقپارات - قازاننىڭ 25 ىنەن 26 سىنا قاراعان ءتۇنى حالىقارالىق رەيستەر بويىنشا ەلوردانىڭ اۋەجايىنا 6 ۇشاق كەلىپ قوندى، دەپ حابارلايدى قازاقپارات ءتىلشىسى.

اۋە رەيستەرىن Air Astana، Turkish Airlines، Belavia جانە Flydubai اۋە كومپانيالارى ورىنداعان. كەلگەن 722 جولاۋشىنىڭ ىشىندە 108 ىندە پ ت ر-تەست انىقتاماسى بولماعان. ولاردىڭ ءبارى دە ستاتسيونارلىق كارانتينگە جاتقىزىلدى. پ ت ر- تەستتەن وتكەننەن كەيىن اتالمىش جولاۋشىلاردا ۆيرۋس انىقتالماسا ۇيىنە، انىقتالسا ينفەكتسيالىق ستاتسيونارعا بارادى.

2020-جىلدىڭ 27- قازانىنان باستاپ ق ر باس مەملەكەتتىك سانيتارلىق دارىگەر ەرلان قياسوۆتىڭ جاڭا قاۋلىسى كۇشىنە ەنەدى. وعان سايكەس مەملەكەتتىك شەكارالارداعى وتكىزۋ پۋنكتەرىندە كوروناۆيرۋس ينفەكتسياسىنىڭ تارالۋىن بولدىرماۋ ماقساتىندا شارالار كۇشەيتىلمەك. جاڭا قاۋلى بويىنشا قازاقستانعا كەلگەن ازامات كەم دەگەندە ءۇش كۇن بۇرىن پتر- تەستتەن وتكەنى تۋرالى انىقتامانى تاپسىرۋى كەرەك.

5 جاسقا دەيىنگى بالالاردان بۇل تالاپ ەتىلمەيدى. الايدا كىشكەنتاي بالانى الىپ جۇرگەن وكىلىندە وسىنداي انىقتاما بولۋى ءتيىس. حالىقارالىق ترانزيتتىك جولاۋشىلار ترانزيتتىك اۋماقتان كەتپەۋى كەرەك. اۋە كومپانيالارىنىڭ باسشىلارى قونعان اۋە كەمەسىنىڭ بورتىنا پ ت ر- انىقتاماسى جوق شەتەل ازاماتتارىن كىرگىزبەۋى ءتيىس.