اياعىنىڭ ۇزىندىعى 108 سانتيمەتر بولاتىن بويجەتكەن جەلىدە تانىمال بولدى

 استانا. قازاقپارات - شۆەتسيانىڭ فيتنەس- مودەلى جانە بوديبيلدەرى يا وستەرگرەن ەرەكشە دەنە ءبىتىمىنىڭ ارقاسىندا تانىمال بولدى.

بويى 178, ال اياعىنىڭ ۇزىندىعى 108 سانتيمەتر بولاتىن بويجەتكەندى كەيبىرەۋلەر وزگە عالامشارلىققا ۇقساتادى.

34 جاستاعى مودەل ءوزىنىڭ ينستاگرام پاراقشاسىنا جاتتىعۋ زالىندا جانە باسقا جەرلەردە تۇسكەن سۋرەتتەرىن ءجيى جاريالاپ تۇرادى.

اياعىنىڭ ۇزىندىعىمەن تانىمال بولعان بويجەتكەننىڭ پاراقشاسىنا 141 مىڭ جەلى قولدانۋشىلار جازىلعان.

 قىزدىڭ ايتۋىنشا، يا بالا كەزىندە ارىقتىعىنان جانە اياعىنىڭ ۇزىندىعىنان قىسىلىپ، ءوزىن ۇسقىنسىز ۇيرەك سەكىلدى سەزىنگەن.

 بىرنەشە جىل بۇرىن ول جاتتىعۋ زالىنا بارىپ، بەلسەندى دايىندالا باستاعان. سودان كەيىن بويجەتكەن الەۋمەتتىك جەلىدە پاراقشا اشىپ، دەنە بىتىمىندەگى وزگەرىستەرمەن بولىسكىسى كەلگەن. بۇل تۋرالى Medialeaks حابارلادى، دەپ جازادى Stan.kz اقپاراتتىق اگەنتتىگى.

 يا جەلىگە تەك سۋرەتتەر عانا سالىپ قويماي، سونىمەن قاتار ءوزى تۋرالى، ديەتاسى مەن جاتتىعۋ زالىندا قالاي دايىندالعانى تۋرالى دا جازادى. فيتنەس- مودەل جاتتىعۋ زالىنا كۇن سايىن بارادى ەكەن. بالمۇزداقتى جاقسى كورەتىن شۆەتسيالىق بويجەتكەن اپتاسىنا كەمىندە 2,2 كەلى ەت جەيمىن، دەيدى. ول سونداي- اق، بانان قوسىلعان سۇلى جارماسى، مانگو، كوكوس ءسۇتى سەكىلدى پايدالى تاعامداردى دا تۇتىنادى.

بويجەتكەن بولاشاق كۇيەۋىمەن ينستاگرام ارقىلى تانىسقان. ول توربورن اتتى بەلگىلى شۆەدتىك بوديبيلدەرمەن شاڭىراق كوتەرگەنىنە ءالى سەنبەيدى. يا وزىنە وسىنداي تانىمال ادام ءسوز سالادى دەپ مۇلدە ويلاماپتى.

ەكى عاشىق 2014 -جىلدىڭ تامىزىندا وتاۋ قۇرعان. كەيىن بويجەتكەن جۇبايى جانە بالاسىمەن سەرۋەندەپ جۇرگەن سۋرەتتەرىن جاريالاپ، جەلى قولدانۋشىلارىن قۋانتتى.

شۆەتسيالىق يا وستەرگرەن جەرگىلىكتى جاسوسپىرىمدەر اراسىندا سۇلۋلىق ەتالونىنا اينالعان. ول ءسان كورسەتىلىمدەرىنە قاتىسىپ مىڭداعان دوللار تابادى ەكەن.