ءماجىلىستىڭ 107 دەپۋتاتىنا كۋالىكتەر مەن بەلگىلەر تاپسىرىلدى

نۇر-سۇلتان. قازاقپارات - بۇگىن ق ر ورتالىق سايلاۋ كوميسسياسى 7-شاقىرىلعان ق ر پارلامەنتى ءماجىلىسىنىڭ دەپۋتاتتارىن تىركەدى، دەپ حابارلايدى قازاقپارات ءتىلشىسى.

«زاڭناماعا سايكەس پارلامەنت دەپۋتاتىنىڭ وكىلەتتىگى ونى ورتالىق سايلاۋ كوميسسياسى پارلامەنت دەپۋتاتى رەتىندە تىركەگەن ساتتەن باستالادى. سايلانعان دەپۋتاتتاردى تىركەۋ ءۇشىن زاڭنامامەن كوزدەلگەن بارلىق نەگىز بار. وسىعان وراي كۇن تارتىبىنە 7-شاقىرىلعان ق ر پارلامەنتى ءماجىلىسىنىڭ دەپۋتاتتارىن تىركەۋ تۋرالى ماسەلە شىعارىلدى»، - دەدى وتىرىستى اشقان ق ر و س ك ءتوراعاسى بەرىك يماشەۆ.

وسىدان كەيىن ق ر و س ك مۇشەسى اناستاسيا شەگورسوۆا «سايلاۋ تۋرالى» كونستيتۋتسيالىق زاڭنىڭ 97-1-بابىنىڭ 5-تارماعىنا سايكەس، دەپۋتاتتىق مانداتتاردى ءبولۋ كەزەكتىلىگى ساياسي پارتيانىڭ باسشى ورگانى سايلاۋ قورىتىندىسى جاريالانعان كۇننەن باستاپ 10 كۇننەن كەشىكتىرمەي ايقىندايتىنىن ايتتى.

«اق جول»، «Nur Otan» جانە قازاقستاننىڭ حالىق پارتياسى ساياسي پارتيالارىنىڭ ءتيىستى قۇجاتتارى وسى جىلدىڭ 12 جانە 13-قاڭتارىندا ق ر و س ك- گە ۇسىنىلدى. سونىمەن قاتار سايلاۋ زاڭناماسى نەگىزىندە نۇر-سۇلتان قالاسىنىڭ اۋماقتىق كوميسسياسى و س ك- گە قازاقستان حالقى اسسامبلەياسى سايلايتىن ءماجىلىس دەپۋتاتتارىن سايلاۋ بويىنشا داۋىستاردى ساناۋ حاتتاماسىن ۇسىندى. كونستيتۋتسيالىق زاڭنىڭ 98-بابىنا سايكەس، وسك سايلانعان ءماجىلىس دەپۋتاتتارىن تىركەيدى. سايلاۋ تۋرالى زاڭنىڭ 45-بابىندا وسك سايلانعان پارلامەنت دەپۋتاتتارىن 7 كۇن مەرزىم ىشىندە ولاردان كونستيتۋتسياعا جانە رەسپۋبليكا زاڭدارىنا سايكەس، پارلامەنت دەپۋتاتتارىنىڭ مارتەبەسىمەن ساي كەلمەيتىن ءوز مىندەتتەرىن دوعارۋ تۋرالى جازباشا وتىنىشتەرىن العاننان كەيىن تىركەيدى دەپ بەلگىلەنگەن. اتالعان وتىنىشتەر الىندى. سايلاۋ زاڭناماسىندا وسك ءاربىر دەپۋتاتقا ءوزى بەلگىلەگەن ۇلگىدەگى كۋالىك پەن ومىراۋعا تاعاتىن بەلگىنى تاپسىراتىنى كووزدەلگەن»، - دەدى ول.

بۇدان سوڭ ق ر ورتالىق سايلاۋ كوميسسياسىنىڭ مۇشەلەرى قاۋلى جوباسىنا ءبىراۋىزدان داۋىس بەرىپ، ق ر و س ك ءتوراعاسى بەرىك يماشەۆ جاڭا سايلانعان ءماجىلىس دەپۋتاتتارىنا كۋالىك پەن ومىراۋعا تاعاتىن بەلگىنى تاپسىردى.

ايتا كەتەيىك، 7-شاقىرىلعان ق ر پارلامەنتى ماجىلىسىنە ەلىمىزدەگى 3 ساياسي پارتيا جانە قازاقستان حالقى اسسامبلەياسىنىڭ كانديداتتارى دەپۋتات بولدى. اتاپ ايتقاندا، «Nur Otan» پارتياسى 76، «اق جول» قازاقستاننىڭ دەموكراتيالىق پارتياسى 12، قازاقستاننىڭ حالىق پارتياسى 10 ماندات يەلەندى. سونىمەن قاتار قازاقستان حالقى اسسامبلەياسى اتىنان 9 دەپۋتات سايلاندى.

بۇگىن پرەزيدەنت قاسىم-جومارت توقايەۆ 15-قاڭتار كۇنى جەتىنشى شاقىرىلعان پارلامەنتتىڭ ءبىرىنشى سەسسياسىن وتكىزۋ تۋرالى جارلىققا قول قويدى.

اۆتور: مارلان جيەمباي