قازاق تەلەۆيزياسىنىڭ تۇڭعىش ديكتورى 103 جاسقا تولدى
زۇلقيا مۇقان قىزى جۇماتوۆا 1920 -جىلدىڭ 20-اقپانىندا پاۆلودار وبلىسىنىڭ باياناۋىل اۋدانىندا دۇنيەگە كەلگەن.
ارداگەر الماتى تەلەستۋدياسى اشىلعان 1958 -جىلى ديكتورلىققا جاريالانعان كونكۋرسقا قاتىسىپ، 750 ادامنىڭ اراسىنان ۇزدىك شىقتى. 20 كىسىدەن تۇراتىن سول كەزدەگى كوميسسيا مۇشەلەرىنىڭ ءبىرى قازاقتىڭ ايگىلى رەجيسسەرى - شاكەن ايمانوۆ بولعان.
ديكتورلىق ءداۋىردىڭ دارا تۇلعاسىنىڭ سانالى عۇمىرى - كورەرمەننىڭ كوز الدىندا. كوپتىڭ ىقىلاسىنا بولەنگەن ول حالقىنا قاشان دا تىلەكشى. سول قالپىنان تانباعان تەلەۆيزيا ارداگەرى ۇلتتىق ارنا كورەرمەندەرىنە ىستىق ىقىلاسىن ءبىلدىردى.
«قۇرمەتتى تەلەديدار كورەرمەندەرى! ۇلكەن ساعىنىشپەن سىزدەرمەن بۇگىن تەلەۆيدەنيە ارقىلى قاۋىشىپ وتىرمىز. بۇگىن تەلەۆيدەنيەنىڭ 65 جىلعا تولعان مەرەيتويى قۇتتى بولسىن!»، دەيدى قازاقستاننىڭ تۇڭعىش ديكتورى، تەلەۆيزيا ارداگەرى زۇلقيا جۇماتوۆا.
اتا-اناسىنان ەرتە ايىرىلىپ، تاعدىر تاۋقىمەتىن كوپ تارتقان زۇلحيا جۇماتوۆا سوعىس جىلدارى زاۋىتتا جۇمىس ىستەپ، تىلدا جان اياماي ەڭبەك ەتتى.
جاستايىنان شىعارماشىلىققا، ونەرگە دەگەن قۇشتارلىعى ونى تەلەۆيزيا سالاسىنا جەتەلەدى. 1958 -جىلى ىرىكتەۋگە قاتىسىپ، كوميسسيا مۇشەسى شاكەن ايمانوۆتىڭ كوزىنە تۇسەدى.
«ديكتور بولامىن دەپ بارعانىم جوق. رەداكسياسىنا بالالارعا ارنالعان رەداكتور بولۋعا مۇمكىن ءتۇسىپ قالارمىن دەپ ويلاپ باردىم»، دەيدى قازاقستاننىڭ تۇڭعىش ديكتورى، تەلەۆيزيا ارداگەرى زۇلقيا جۇماتوۆا.
وسىلايشا، قازاق تەلەديدارىنداعى تۇڭعىش ديكتور بولۋ باقىتى زۇلقيا جۇماتوۆانىڭ پەشەنەسىنە جازىلدى. قوس عاسىر كۋاگەرىنىڭ عۇمىرى بارلىق بۋىن وكىلدەرىنە ونەگە.
ارداگەر پەيىلى كەڭ، ادامدىقتان اتتاماعان ادام كوپ جاسايدى دەيدى.