ەلوردادا 103 قىزمەتىنە تۇسەتىن قوڭىراۋ 4 ەسە ارتىپ كەتتى

نۇر-سۇلتان. قازاقپارات - ەلوردادا 103 قىزمەتىنە قوڭىراۋ شالۋشىلار 4 ەسە ارتىپ كەتتى.

بۇل تۋرالى نۇر-سۇلتان قالاسىنىڭ قالالىق جەدەل مەديتسينالىق جاردەم ستانساسىنىڭ ديرەكتورى مۇرات ورازبايەۆ ايتتى، دەپ حابارلايدى قازاقپارات ءتىلشىسى.

«بۇگىنگى تاڭدا 103 قىزمەتىنىڭ جۇكتەمەسى ارتتى. ماۋسىم ايىنان باستاپ قوڭىراۋلار سانى 4 ەسە ءوستى. كۇنىنە نۇر-سۇلتان قالاسىنىڭ تۇرعىندارىنان 4 مىڭنان استام قوڭىراۋ تۇسەدى. شاقىرتۋلار سانى 2 ەسە ءوستى. ياعني، كۇنىنە شامامەن شىعۋ بريگاداسى 5 مىڭعا جۋىق قالا تۇرعىنىنا مەديتسينالىق كومەك كورسەتەدى. بۇل ۇلكەن جۇكتەمە»، - دەدى ول.

ونىڭ اتاپ وتۋىنشە، 103 قىزمەتىنە جۇكتەمەنىڭ ارتۋىن بايلانىستى 103 ءپۋلتىنىڭ سانى ارتتىرىلىپ، نۇر-سۇلتان قالاسى تۇرعىندارىنا 705103 ءنومىرى بويىنشا call-ورتالىق ۇيىمداستىرىلعان.

قالا تۇرعىندارى وسى نومىرگە قوڭىراۋ شالۋ ارقىلى كوروناۆيرۋس ينفەكتسياسىمەن بايلانىستى بارلىق ساۋالدارىنا جاۋاپ الا الادى. سونىمەن قاتار، ستانسا ديرەكتورى ەلوردا تۇرعىندارى تاراپىنان جەدەل مەديتسينالىق جاردەم كولىگىنىڭ شاقىرتۋلارعا وتە كەش كەلەتىندىگىنە قاتىستى شاعىمدارىنا جاۋاپ بەردى.

«كەشىگىپ بارعان شاقىرتۋلاردىڭ دا بار ەكەندىگىن جاسىرمايمىن. پايىزدىق ۇلەسى 5 پايىزعا دەيىنگى ارالىقتى قۇرايدى. بۇل رۇقسات ەتىلگەن شەك. ءاربىر ەلوردالىق جەدەل كومەك وزىنە تەز ارادا كەلگەنىن قالايتىندىعىن تۇسىنەمىن. وسى رەتتە ءاربىر شاقىرتۋ جەدەل مەديتسينالىق كومەك ديسپەتچەرى دەڭگەيىندە 4 ساناتقا بولىنەتىندىگىن جانە ءار ساناتتىڭ ۋاقىت جانە كەلۋ رەگلامەنتى بار ەكەندىگىن اتاپ وتكىم كەلەدى»، - دەدى مۇرات ورازبايەۆ.