پاۆلودارعا تۇركيادان ۇشىپ كەلگەن قازاقستاننىڭ 102 ازاماتىنان كوروناۆيرۋس تابىلمادى
«قۇرمەتتى پاۆلودار وبىسى تۇرعىندارى! وزدەرىڭىز بىلەتىندەي، الەمدەگى كوروناۆيرۋس پاندەمياسىنا بايلانىستى كەشە پاۆلودارعا تۇركيادان 102 قازاقستان ازاماتى كەلدى. بارلىعى كارانتيندىك گوسپيتالدا وقشاۋلاندى، ولاردىڭ ىشىندە پاۆلودار وبلىسى مەن شەكارالاس وبلىستاردىڭ تۇرعىندارى دا بار»، - دەيدى وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءبىرجان دوسمايلوۆ.
سونىمەن قاتار ءبىرجان دوسمايلوۆ بارلىعىنا ساراپتاما جاسالىپ، ولاردىڭ ناتيجەسى بۇگىن بەلگىلى بولعانىن ءمالىم ەتتى.
«قۋانىشىمىزعا قاراي، وتانداستارىمىزدىڭ ەشقايسىسىنان COVID-19 بەلگىلەرى تابىلعان جوق. قايتالاپ ايتامىن، بارلىعىنىڭ دەنى ساۋ. جانە دە بۇل ازاماتتار الداعى 14 كۇن ىشىندە دارىگەرلەردىڭ باقىلاۋىندا بولادى. ءوزىڭىز بەن وتباسىڭىزعا قورعان بولىڭىز»، - دەدى باسقارما باسشىسىنىڭ مىندەتىن اتقارۋشى.