اڭىزعا اينالعان «قىز جىبەكتىڭ» رەجيسسەرى سۇلتان قوجىقوۆتىڭ تۋعانىنا 100 جىل تولدى
ايتۋلى داتاعا وراي الماتىلىقتار «قازاق فيلم» كينوستۋدياسىنىڭ جۇلدىزدار اللەياسىنداعى ەستەلىك جۇلدىزىنا گۇل شوعىن قويدى، دەپ حابارلايدى قازاقپارات ءتىلشىسى.
شارا بارىسىندا اتاقتى رەجيسسەردىڭ تۋعان-تۋىستارى، كينەماتوگرافتار جانە «قازاق فيلم» كينوستۋدياسىنىڭ ۇجىمى ەستەلىكتەرىن ءبولىستى.
«مەمكينوعا تاقىرىپتىق جوسپاردى بەكىتۋ ءۇشىن ماسكەۋگە بارعان كەزەكتى ساپارىندا بۇرىنعى كينوستۋديا باسشىسى كامال سمايىلوۆقا ۇسىنىلعان سەناريلەردىڭ ءبىرىن بەكىتپەدى. سودان مەملەكەتتىك كوميتەتتىڭ باس رەداكتورىن كامال سەيتجان ۇلى وعان باسقا، نەعۇرلىم قولايلى سەناريمەن الماستىرۋعا ۋاقىت بەرۋگە كوندىردى. الماتىعا ورالىپ عابيت مۇسىرەپوۆكە قوڭىراۋ شالىپ، «قىز جىبەك» پەساسىن كينوسەناريگە اينالدىرۋدى ءوتىندى. ع. مۇسىرەپوۆ ءبىر اي ىشىندە كامال سمايىلوۆتىڭ تاپسىرماسىن ورىندادى. وسىلايشا سەناري قۇتقارىلىپ، كەيىننەن ۇلتتىق كينوشەديەۆرگە اينالدى»، - دەيدى رەجيسسەر بولات ءشارىپ.
كورنەكتى رەجيسسەردىڭ مەرەيتويىنا ارنالعان ءىس-شارا سۇلتان-احمەت قوجىقوۆ اتىنداعى 39№ مامانداندىرىلعان ليتسەيدىڭ قابىرعاسىندا جالعاستى.
ليتسەي وقۋشىلارى شىعارماشىلىق كەش ۇيىمداستىرىپ، قوناقتارعا مەرەيتوي يەسىنىڭ ءومىرى مەن شىعارماشىلىعىنان تەاترلاندىرىلعان قويىلىم ۇسىندى.
س. قوجىقوۆ 1923-جىلى 10- ناۋرىز كۇنى تاراز جەرىندە دۇنيەگە كەلگەن.
بالالىق شاعىندا سۋرەت سالۋمەن اۋەستەنگەن ول ۆ گ ي ك- ءتىڭ رەجيسسەرلىك فاكۋلتەتىنە وقۋعا تۇسەدى. شىعارماشىلىق جولىن قازاق دراما تەاترىنىڭ سۋرەتشى-بەزەندىرۋشىسى رەتىندە 1942-جىلى باستاعان.
بۇل كەزدە ول 18 جاستا عانا بولاتىن. 19 جاسىندا «ەڭلىك-كەبەك» سپەكتاكلىن بەزەندىردى.
1941-جىلى سوعىسقا اتتانعان ول رەسپۋبليكا ۇكىمەتىنىڭ شاقىرۋىمەن تەز ارادا كەرى ورالىپ، ماسكەۋدەن الماتىعا كوشىرىلگەن بىرىككەن ورتالىق كينوستۋديادا كينوسۋرەتشىلىك كاسىبىن باستايدى.
قوجىقوۆ ايگىلى رەجيسسەر گريگوري روشال تۇسىرگەن «اباي ءانى» فيلمىن جاساۋعا، وزگە دە العاشقى قازاق كينولارىنا تىكەلەي اتسالىسقان.
سۇلتان قوجىقوۆتىڭ العاشقى تاۋەلسىز تۋىندىسى - «انا مەن بالا»، كەيىنىرەك «ءبىز جەتىسۋدانبىز» كارتيناسىن ءتۇسىردى.
سۇلتان قوجىقوۆتىڭ ەسىمىن ءدۇيىم جۇرت «قىز جىبەكپەن» بايلانىستىرۋى زاڭدىلىق.
ول - وسى كارتينانى دۇنيەگە الىپ كەلگەن رەجيسسەر. «قىز جىبەك» لەنتاسىنىڭ پرەمەراسىنا بيىل 50 جىل تولدى.