قىتايعا «قورعاس» كەدەنى ارقىلى 100 تونناعا جۋىق قازاقستاننىڭ قوي ءجۇنى كىردى - شەتەلدەگى قازاق ب ا ق- قا شولۋ
4 جەلتوقسان, 11:39

قىتايعا «قورعاس» كەدەنى ارقىلى 100 تونناعا جۋىق قازاقستاننىڭ قوي ءجۇنى كىردى - شەتەلدەگى قازاق ب ا ق- قا شولۋ

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

وزبەكستاندا ابايدىڭ شىعارماشىلىق مۇراسىنا ارنالعان مادەنيەت كۇندەرى وتەدى - «ء و ز ا»


2022 -جىلدىڭ 5-10-جەلتوقسان كۇندەرى وزبەكستاندا ۇلى اقىن، اعارتۋشى، قازاق ادەبيەتىنىڭ نەگىزىن قالاۋشى، فيلوسوف، كومپوزيتور اباي (يبراھيم) قۇنانباي ۇلىنا رانالعان «اباي قۇنانبايەۆ مۇراسى كۇندەرى» اتتى مادەنيەت كۇندەرى ۇيىمداستىرىلادى، دەپ حابارلايدى وزبەكستاندىق «ءو ز ا» اقپاراتتىق اگەنتتىگى.

اتالعان باسىلىمنىڭ مالىمەتىنشە، اباي قۇنانباي ۇلى مۇراسى كۇندەرىن وتكىزۋدەگى ماقسات - وزبەكستان مەن قازاقستان اراسىنداعى مادەني- گۋمانيتارلىق قارىم- قاتىناستى ودان ءارى نىعايتۋ جانە قازاقستان پرەزيدەنتىنىڭ تاشكەنتكە الداعى مەملەكەتتىك ساپارى باعدارلاماسىنىڭ مازمۇنىن بايىتۋ.

مادەنيەت كۇندەرى اياسىندا ءبىرقاتار اۋقىمدى ءىس- شارالار وتكىزۋ جوسپارلانعان. اتاپ ايتقاندا، اقىننىڭ شىعارماشىلىعىنا ارنالعان كورمە ۇيىمداستىرىلادى. سونىمەن قاتار وزبەكستاننىڭ ورتا جانە جوعارى وقۋ ورىندارىندا ەكى ەلدىڭ بەلگىلى اقىن- جازۋشىلارى مەن عالىمدارىنىڭ قاتىسۋىمەن ابايدىڭ ءومىرى مەن شىعارماشىلىعىنا ارنالعان شىعارماشىلىق كەش وتەدى، ۇلتتىق اكادەميالىق دراما تەاتردا «اباي» قويىلىمى كورسەتىلەدى.

ايتا كەتۋ كەرەك، وزبەكستان جازۋشىلار وداعى مۇشەلەرىنىڭ قاتىسۋىمەن جوعارى وقۋ ورىندارىنىڭ گۋمانيتارلىق فاكۋلتەتتەرىندە اباي شىعارماشىلىعىنا ارنالعان ءىس- شارالار دا جوسپاردا بار. سونىمەن قاتار، تاشكەنت مەملەكەتتىك وزبەك ءتىلى جانە ادەبيەتى ۋنيۆەرسيتەتى تاشكەنت مەملەكەتتىك شىعىستانۋ ۋنيۆەرسيتەتىمەن بىرلەسىپ، «اباي فيلوسوفياسى مەن ورتالىق ازيا ويشىلدارى» تاقىرىبىندا عىلىمي- تاجىريبەلىك سەمينار ۇيىمداستىرادى.

بۇدان بولەك، «ءو ز ا» اقپاراتتىق اگەنتتىگىنىڭ دەرەگىنشە، «XIX عاسىرداعى وزبەك جانە قازاق ويشىلدارىنىڭ ورتاق تاريحي- مادەني مۇراسى جانە دۇنيەتانىمىنىڭ نىعايۋى مەن دامۋى» تاقىرىبىنداعى عىلىمي كونفەرەنتسيا، اباي ءومىرى مەن شىعارماشىلىعى تۋرالى دەرەكتى فيلم كورسەتىلىمى، تاشكەنت، ناۋاي، جىزاق، سىرداريا وبلىستارىندا اباي شىعارماشىلىعىنا ارنالعان مادەني- شىعارماشىلىق كەشتەر ءوتۋى جوسپارلانعان.

بايان- ولگيدە «ينتەلليگەنتتەر» دوداسى ۇيىمداستىرىلدى - Kaznews


موڭعوليانىڭ رەسپۋبليكا كۇنىنە وراي بايان- ولگيدە تۇڭعىش رەت ايماقتىڭ ءار وڭىرىنەن 14 كوماندا قاتىسقان «ينتەلليگەنتتەر» دوداسى ءوتتى، دەپ حابارلايدى «Kaznews» اقپاراتتىق اگەنتتىگى.

اتالعان باسىلىمنىڭ دەرەگىنشە، «ينتەلليگەنتتەر» دوداسىنا، «قىزىل جەبە»، «سۇڭقار»، «بولاشاق»، «زەردە» قاتارلى كوماندالار ءوزارا باق سىناسقان.

ايتا كەتەيىك، دودا 5 كەزەڭنەن تۇرادى. اتاپ ايتقاندا، ارمان سقابىل ۇلىنىڭ «ەگىز جۇرەك» كىتابىنان دايىندالعان سۇراقتار، «الەم تاريحى»، «مەملەكەتتەر تۋرالى»، «ەلىمىزدىڭ ەرەكشەلىكتەرى تۋرالى» جانە «قازاق حالقى تۋرالى» دەگەن بەس كەزەڭنەن قۇرالعان.

جارىس قورىتىندىسى بويىنشا، ءۇش ۇزدىك ورىنعا ماراپاتتار بەرىلگەن.

اقپارات سوڭىندا «Kaznews» اگەنتتىگىنىڭ نەگىزىن قالاۋشىسى ومىربەك قاباي ۇلى اتالعان دوداعا دەمەۋشى بولعانى جازىلعان.

قىتايعا «قورعاس» كەدەنى ارقىلى 100 تونناعا جۋىق قازاقستاننىڭ قوي ءجۇنى كىردى - «حالىق گازەتى»

23-قاراشادا قازاقستاننان سالماعى 97,7 توننا يمپورتتالعان قوي ءجۇنى ەلگە شىڭجاڭداعى «قورعاس» كەدەن بەكەتى ارقىلى پويىزبەن كىرىپ، توقىما بۇيىمدارىن ءوندىرۋ جانە قايتا وڭدەۋ ءۇشىن ءحەبەيدىڭ حەنشۋي قالاسىنا جونەلتىلدى. بۇل - 1 قاراشادا قىتاي قانت، ءجۇن، ءجۇن جولاقتارى جانە باسقا دا تاۋارلاردىڭ يمپورتىنا تاريفتىك كۆوتانىڭ ەلەكتروندىق سەرتيفيكاتىن بەرگەننەن بەرى شىڭجاڭداعى كەدەندىك تەكسەرۋدەن وتكەن العاشقى يمپورتتىق تاۋارلار توبى، دەپ حابارلايدى قىتايدىڭ «حالىق گازەتى» اقپاراتتىق پورتالى.

قىتايلىق ب ا ق- تىڭ مالىمەتىنشە، «قورعاس- چجۋندين» حالىقارالىق كولىك- ەكسپەديتورلىق كومپانياسى جاۋاپتى تۇلعاسىنىڭ ايتۋىنشا، وسى ۋاقىتقا دەيىن بۇل كومپانيا 2500 توننا ءجۇن يمپورتتاعانىن جانە بۇرىن ۇنەمى قاعاز تاريفتىك كۆوتا سەرتيفيكاتتارىن قولدانعانىن ايتتى. ەندى ەلەكتروندى سەرتيفيكاتتار پايدالاناتىندىقتان، كاسىپورىنداردى كەدەندىك دەكلاراتسيالاۋ تيىمدىلىگى ەداۋىر ارتىپ، بۇل تاۋارلاردى ىڭعايلى كەدەندىك رەسىمدەۋگە ىقپال ەتەدى.

«حالىق گازەتى» دەرەگىنە سۇيەنسەك، بيىل قىتايلىق باس كەدەن باسقارماسى سىرتقى ساۋدانىڭ تۇراقتىلىعى مەن ساپاسىنا جاردەمدەسۋ، يمپورتتىق تاريفتەر مەن كۆوتالاردى قاعازسىز كەدەندىك رەسىمدەۋگە ىقپال ەتۋ، كورپوراتيۆتىك شىعىنداردى ازايتۋ جانە كورپوراتيۆتىك قيىندىقتاردى جەڭىلدەتۋ بويىنشا ون شارا ەنگىزدى.

«مالىمەتتەرگە سايكەس، وسى جىلدىڭ قاڭتار- قازان ايلارىندا «قورعاس» ارقىلى 4314,8 توننا قوي ءجۇنىن يمپورتتادى. بۇل وتكەن جىلدىڭ سايكەس كەزەڭىمەن سالىستىرعاندا %102 عا ارتقان»، دەپ تۇيىندەيدى قىتايلىق باسىلىم.

يۋنۋس ەمرە ينستيتۋتى ق ر پارلامەنتى كىتاپحاناسىنا بىرنەشە جيناق تابىس ەتتى - TRT

قازاقستانداعى يۋنۋس ەمرە ينستيتۋتى قازاقستان پارلامەنتى ءماجىلىسىنىڭ كىتاپحاناسىنا تۇرىك جانە قازاق تىلدەرىندە باسىلىپ شىققان كىتاپتاردى تابىس ەتتى، دەپ مالىمدەيدى تۇركيا راديو تەليەۆيزيا پورتالى.

اتالعان ب ا ق- تىڭ دەرەگىنشە، ينستيتۋت پارلامەنت ءماجىلىسىنىڭ كىتاپحاناسىنا كىتاپ سىيعا تارتقان العاشقى شەتەلدىك مەكەمە بولدى. قازاقستان پارلامەنتى عيماراتىندا وتكەن كىتاپ تاپسىرۋ راسىمىنە پارلامەنت دەپۋتاتتارى قاتىسقان.

تۇرىك جانە قازاق تىلىندەگى كىتاپتاردى استانا يۋنۋس ەمرە ينستيتۋتى باسشىسى الماگۇل يسينا تارتۋ ەتكەن. ا. يسينا قازاقستان پارلامەنتتىك ءماجىلىسىنىڭ كىتاپحاناسىمەن باسقا سالالارداعى ىنتىماقتاستىق جالعاساتىنىن اتاپ ءوتتى.

ايتا كەتۋ كەرەك، كىتاپحاناعا تارتۋ ەتىلگەن كىتاپتار اراسىندا احمەت ياساۋي، قورقىت اتا، تۇركيا جانە تۇرىك مادەنيەتىن جان- جاقتى تانىتقان ەڭبەكتەر قامتىلعان.

قازاق ەلى «وتانداستار» قورىنىڭ وكىلدەرى بايان- ولگي ايماعىندا ءجۇر - Janadauir.com

قازاقستانعا، 2022 -جىلدىڭ باستاپقى 10 ايىنىڭ مالىمەتى بويىنشا، 15637 ەتنيكالىق قازاق قونىس اۋدارعان. ەڭ كوبى وزبەكستاننان، ياعني 65,2 پايىزىن قۇراپ وتىر. ال، قىتايدان كەلگەندەر 9,2 پايىزىن قۇراسا، رەسەي - 8,8 پايىز، تۇركىمەنستاننان كەلگەن قانداستار 8 پايىزىن قۇراسا، موڭعوليادان - 4,8 پايىز، باسقا ەلدەردەن، ەۋروپادان كەلگەندەر 4 پايىزدى قۇراعان، دەپ باستايدى موڭعوليالىق Janadauir.com پورتالى.

اتالعان باسىلىم قانداستاردىڭ ەلىمىزدەگى باسىمدىق بەرىلگەن ايماقتارعا - سولتۇستىك قازاقستان، شىعىس قازاقستان، سونداي- اق اقمولا، قوستاناي، پاۆلودار وبلىستارىنا كوشىپ بارسا، كوشى- قون قارجىسى، تۇراتىن باسپاناسىنىڭ جال اقىسى، جۇمىسپەن قامتۋ قاتارلى جەڭىلدىكتەر كورسەتىلەتىنىن جازادى.

«قازاقستان ەلى تاۋەلسىزدىك العان جىلداردان باستاپ ەلىمىزبەن ساياسي، ەكونوميكالىق جانە مادەني قاتىناسىن ۇزبەي جالعاستىرىپ كەلە جاتىر. ايماعىمىزدا «وتانداستار» قورى سىرتقى قاتىناستار ءبولىمىنىڭ كەڭەسشىسى قالىبەك قوبىلاندين مەن قانداستاردى اقپاراتتىق قولداۋ دەپارتامەنتىنىڭ باسقارۋشى ديرەكتورى گۇلميرا بەكەتاي قىزى كەلىپ جۇمىس ىستەۋدە»، - دەپ حابارلاعان موڭعوليالىق ب ا ق.

قازاقستان يراننىڭ ترانزيتتىك الەۋەتىن پايدالانۋدى قۋاتتايدى - Parstoday

قازاقستاننىڭ ساۋدا دامۋ مينيسترلىگىنىڭ ورىنباسارى ي ي ر- دىڭ ترانزيتتىك الەۋەتىن پايدالانۋدى تالاپ ەتتى. بۇل تۋرالى وسى اپتادا يراننىڭ Parstoday اقپارات اگەنتتىگى حابارلادى.

يراندىق ب ا ق- تىڭ مالىمەتىنشە، قازاقستاندىق كومپانيا باس ديرەكتورىنىڭ ورىنباسارى نۇرلان قۇلباتىروۆ، قازاقستاننىڭ ساۋدا دامۋ مينيسترلىگىنىڭ ورىنباسارى باستاعان وسى ەلدىڭ ساۋدا- كولىك دەلەگاتسياسىنىڭ تەگەرانداعى يران ساۋدا پالاتاسىنىڭ حالىقارالىق ورىنباسارىمەن بىرلەسكەن كەزدەسۋىندە قازاقستان پرەزيدەنتىنىڭ جاقىندا يرانعا ساپارىنا بايلانىستى پىكىر الماسقان.

«قازاقستان ۇكىمەتىنىڭ ماڭىزدى ماقساتتارىنىڭ ءبىرى - يراننىڭ ترانزيتتىك الەۋەتىن پايدالانۋ. يراننىڭ قازاقستانعا ەكسپورتتىق الەۋەتى وتە جوعارى بولعانىمەن، قازاقستانعا يراندىق تاۋارلاردىڭ تومەن كولەمى عانا كىرەدى»، - دەگەن ن. قۇلباتىروۆ.

ال يراندىق وكىلدەردىڭ ءبىرى اليرەزا ياۆاري ەكى ەل اراسىنداعى وتە جاقىن قارىم- قاتىناستارعا توقتالىپ، قازاقستاننىڭ يرانمەن ساۋدا ىنتىماقتاستىعىن دامىتۋ - باستى باعىتتاردىڭ ءبىرى ەكەنىن قۋاتتاعان.

اۆتور

بەيسەن سۇلتان


جاڭالىقتار