ەلىمىزگە شەتەلدەن 100 ۇزدىك مامان تارتىلادى

None
استانا. قازاقپارات - شەتەلدىكتەردىڭ قازاقستاندا تۇرۋىنا ىقتيارحات بەرۋ مۇمكىندىگى قاراستىرىلعان «باعالى داعدىلار ۆيزاسى» ەنگىزىلەدى.

بۇل تۋرالى بۇگىن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.

تامارا دۇيسەنوۆانىڭ اتاپ وتۋىنشە، «اشىق قازاقستان 500+» اتتى كوشى- قون ساياساتىنىڭ جاڭا تۇجىرىمداماسىنىڭ ءۇشىنشى باعىتى اياسىندا ەلىمىزدە تاپشى بولعاندىقتان، سىرتتان ءجيى تارتىلاتىن ماماندىقتار بويىنشا شەتەلدەن 100 ۇزدىك ماماندى تارتۋ كوزدەلىپ وتىر.

«مۇنداعى نەگىزگى ماقسات - ءبىلىم ترانسفەرتى جانە وسى كاسىپتەر بويىنشا ءوز ماماندارىمىزدى دايارلاۋ. ولاردىڭ قازاقستاندا تۇرۋىنا ىقتيارحات بەرۋ مۇمكىندىگى قاراستىرىلعان «باعالى داعدىلار ۆيزاسى» ەنگىزىلەدى. سونىمەن بىرگە «قۇندى داعدىلار رەيتينگى» جاسالادى. بۇل رەيتينگتەگى تاپشى كاسىپتەر مەن ماماندىقتار ءتىزىمى ۇنەمى جاڭارتىلىپ وتىرادى»، - دەدى ول.

ءمينيستردىڭ ايتۋىنشا، كورشى ەلدەردەن كەلەتىن، سونىڭ ىشىندە تىركەۋسىز، بەيرەسمي ارنالار ارقىلى كەلىپ جاتقان ەڭبەك ميگرانتتارىنىڭ قوزعالىسىن ەسەپكە الۋدى كۇشەيتۋ كوزدەلىپ وتىر.

«ەڭبەك ميگرانتتارىن تارتۋ جەكە تۇلعالاردىڭ ناقتى سۇرانىسىنا ساي ايقىندالادى. سونداي- اق ميگرانتتاردىڭ جۇمىس ورنىنا قاتاڭ باقىلاۋ ورناتىلاتىن بولادى»، - دەدى تامارا دۇيسەنوۆا.

اۆتور

مارلان جيەمباي

سوڭعى جاڭالىقتار