قازاقستانعا كەلۋ ءۇشىن ۆيزا تالاپ ەتىلمەيتىن ەلدەر سانىن 100 گە دەيىن ۇلعايتۋ ۇسىنىلدى
مۇنداي ۇسىنىستى ورتالىق كوممۋنيكاتسيالار قىزمەتىندە وتكەن بريفينگتە تۋريزم يندۋسترياسى كوميتەتىنىڭ ءتوراعاسى داستان رىسپەكوۆ ايتتى، دەپ حابارلايدى قازاقپارات ءتىلشىسى.
«بيىل 74 ەلدىڭ ازاماتتارى ءۇشىن قازاقستانعا ۆيزاسىز كەلۋ رەجيمى قالپىنا كەلتىرىلدى. ءۇندىستان، قىتاي جانە يران ازاماتتارى ءۇشىن قوسىمشا ۆيزاسىز رەجيم ەنگىزىلدى. 28 ەلمەن 113 باعىت بويىنشا حالىقارالىق اۋە قاتىناسى قالپىنا كەلتىرىلدى. تۋريستەر سانىن ارتتىرۋ ماقساتىندا قازاقستانعا كىرۋ ءۇشىن ۆيزا تالاپ ەتىلمەيتىن ەلدەر سانىن 100-گە دەيىن ۇلعايتۋدى ورىندى دەپ ەسەپتەيمىز»، - دەپ اتاپ ءوتتى كوميتەت ءتوراعاسى.
بۇدان بولەك، داستان رىسپەكوۆ 5 حالىقارالىق باعىت بويىنشا اۋەرەيستەردىڭ سانى ارتاتىنىن مالىمدەدى. اتاپ ايتقاندا، رەسەيگە – 8، موڭعولياعا – 2، قىتايعا -10، ءۇندىستانعا - 4 جانە فرانسياعا 2 قوسىمشا رەيستەر اشىلماق.
ەسكە سالايىق، بۇعان دەيىن شەتەلدىك تۋريستەردىڭ ەلىمىزدىڭ قاي وڭىرلەرىنە كوپ ساياحاتتايتىنىن جازىپ ەدىك. تۋريزم يندۋسترياسى كوميتەتىنىڭ دەرەگىنشە، وزگە مەملەكەتتەردەن كەلگەندەر الماتى، استانا قالالارى مەن ماڭعىستاۋ وبلىسىنا ءجيى ساپارلايدى.
اۆتور
ءاليحان اسقار