قازاقستاندا 100- بالاعا بۇيرەك ترانسپلانتاتسياسى ءساتتى جاسالدى
29 -ساۋىردە انا مەن بالا ۇلتتىق عىلىمي ورتالىعىندا ەلىمىزدەگى 100- بالاعا بۇيرەك ترانسپلانتاتسياسى جاسالىپ، وتا ءساتتى ءوتتى.
ورتالىقتا بۇيرەك ترانسپلانتاتسياسى 2012 -جىلدان بەرى جاسالادى. 2015 -جىلدان باستاپ انا مەن بالا ۇلتتىق عىلىمي ورتالىعىندا بالالارعا قايتىس بولعان ادامداردان بۇيرەك ترانسپلانتاتسياسى جاسالادى. بۇيرەگى اۋىستىرىلعان ەڭ كىشكەنتاي بالاعا 3 جاس 6 اي، سالماعى نەبارى 10,5 كەلى بولعان. وتاندىق ماماندار جاساعان بۇيرەك ترانسپلانتاتسياسىنىڭ ناتيجەسى الەمدىك كلينيكالارمەن بىردەي. مۇشە ترانسپلانتاتسيالانعان بالالاردىڭ ءومىر ءسۇرۋ دەڭگەيى ەۋروپاداعىداي. بۇگىنگى تاڭدا بۇل كورسەتكىش % 94,4 دەيىن جەتەدى.
«بالالاردى وپەراتسياعا دۇرىس دايىنداۋ عانا ەمەس، سونىمەن قاتار نەفرولوگيا جانە دياليز بولىمىندە وتەتىن وپەراتسيادان كەيىنگى ەمدەۋ وتە ماڭىزدى. وسىعان بايلانىستى ءبىزدىڭ ماماندارىمىزعا دارىگەر- ەففەرەنتولوگ، ەرەسەك رەانيماتسيا- انەستەزيولوگيا ءبولىمىنىڭ كومانداسىنا، بالالار رەانيماتسياسى جانە انەستەزيولوگيا ءبولىمىنىڭ كومانداسىنا، دارىگەر- انەستەزيولوگ، حيرۋرگتەر مەن بارلىق ۋرولوگتارعا، بۇيرەك ترانسپلانتاتسياسىنا قاتىسقان مەدبيكەلەر مەن انەستەزيولوگتارعا زور العىس بىلدىرەمىز»، دەلىنگەن حابارلامادا.
بۇگىنگى تاڭدا اتالمىش ورتالىق بۇيرەك ترانسپلانتاتسياسى بويىنشا قازاقستاندا جالعىز. وتاندىق مامانداردىڭ ەمنىڭ وسى كۇردەلى ءتۇرىن مەڭگەرۋىنىڭ ارقاسىندا قازىر بۇيرەك پەن باۋىردى ترانپلانتاتسيالاۋعا مۇقتاج بالالارعا شەتەلدىك كلينيكالارعا بارماي- اق قويۋىنا بولادى.
اۆتور: اياۋلىم التىنبەك