الماتىنىڭ 100 گە جۋىق تۇرعىنى قارجى پيراميداسىنىڭ قۇربانى بولدى
قالالىق پوليتسيا دەپارتامەنتىنىڭ باسپا ءسوز قىزمەتى ءمالىم ەتكەندەي، 14- جەلتوقسان كۇنى مەدەۋ اۋداندىق پوليتسيا باسقارماسىنا قارجى ۇيىمىنا اقشا سالعان 99 ادامنان ۇجىمدىق ارىز تۇسكەن.
جابىرلەنۋشىلەردىڭ سوزىنشە، كومپانيا باسشىسى سالىمشىلاردىڭ قارجىسىن كوبەيتىپ بەرەتىنىن سىلتاۋراتىپ، اقشا جيناپ، قىزمەت كورسەتۋ بويىنشا جەكە كەلىسسوزدەر جاساعان.
«اتالعان فاكت سوتقا دەيىنگى تەرگەۋدىڭ ءبىرىڭعاي تىزىلىمىندە قازاقستان رەسپۋبليكاسى قىلمىستىق كودەكسىنىڭ 190-بابى، 3- ءبولىمى بويىنشا تىركەلدى. ءىستىڭ ءمان-جايىن انىقتاۋعا جانە كىنالى ادامداردى جاۋاپكەرشىلىككە تارتۋعا باعىتتالعان قاجەت تەرگەۋ جانە جەدەل ءىس- شارالار جۇرگىزىلەدى»، - دەپ حابارلادى پوليتسيادان.
ارتىنشا الەۋمەتتىك جەلىدە الماتىلىق قارجى پيراميداسىنىڭ ديرەكتورى بولۋى مۇمكىن دەگەن ەر ادامنىڭ ۆيدەوسى تارادى. ەر ادام ەكى جىل بۇرىن كومپانيا قۇرعانىن ايتادى. قازىرگى جاعداي ونىڭ ەلدە بولماۋىنا بايلانىستى بولعان. ەر ادام جاقىن ارادا الماتىعا ورالىپ، پايىزبەن سالىنعان اقشانى قايتارىپ بەرۋگە ۋادە بەردى.