قازاقپاراتتىڭ 100 جىلدىعى سىيلىعىن موڭعولياداعى قازاقءتىلدى پورتال جەڭىپ الدى
ماراپات رەسەيلىك «ت ا س س» اگەنتتىگى مەن موڭعولياداعى قازاقءتىلدى «Kaznews» پورتالىنا ءبولىپ بەرىلدى. «ءبىر عاسىرلىق تاريحى بار «قازاقپارات» حالىقارالىق اقپارات اگەنتتىگىنىڭ نەگىزگى دامۋى ءبىزدىڭ ەلىمىزدىڭ تاۋەلسىزدىك العان كەزىنەن باستالدى. سول كەزدە ءبىز حالىقارالىق اقپارات اگەنتتىگى اتاندىق. سونىمەن، وسى ارنايى جۇلدەنى ءبىز ءوزىمىزدىڭ شەتەلدىك ارىپتەستەرگە بەرەتىن بولدىق. ەكىگە بولەتىن بولدىق. سوندىقتان، ۇركەر مۇسىنشەسى مەن سەرتيفيكاتتى 100 جىل بويى ارىپتەس بولعان رەسەيلىك ت ا س س اقپارات اگەنتتىگىنە بەرۋدى ۇيعاردىق»، - دەدى «قازاقپارات» ا ق باسقارما ءتوراعاسى اسقار ۋماروۆ «ۇركەر-2020» ۇلتتىق سىيلىعىنىڭ ماراپاتتاۋ كەشىندە.
سىيلىقتى ت ا س س اگەنتتىگىنىڭ قازاقستانداعى وكىلى دميتريي كارامان الدى.
«كۇتپەگەن جەردەن مۇنداي سىيلىق العانىمىزعا قۋانىشتىمىز. جەكە ءوزىم قازاقستاندا ءبىر جىلدان بەرى جۇمىس ىستەپ كەلەمىن. وسىنداي از ۋاقىتتا قازاقستان مەن ءۇشىن جاقىن ءارى ىستىق ەلگە اينالدى. ءبىزدىڭ اگەنتتىكتىڭ قازاقستانمەن جانە قازاقپارات اگەنتتىگىمەن جىلدار بويعى تابىستى قارىم- قاتىناسى ءالى دە جالعاسىن تابادى دەپ ۇمىتتەنەمىن. راحمەت»، - دەدى دميتريي كارامان.
تيىسىنشە، 1 ميلليون تەڭگە اقشالاي جۇلدە موڭعولياداعى قازاقتىلدى «Kaznews» پورتالىنا بەرىلدى.
«ءبىزدىڭ اگەنتتىكتە 46 حالىقارالىق سەرىكتەسىمىز بار. ودان بولەك، بىلتىر وتانداستار قورىمەن بىرىگىپ، اقپارات جانە قوعامدىق دامۋ مينيسترلىگىنىڭ قولداۋىمەن العاش رەت «شەتەلدەگى قازاقءتىلدى ب ا ق» جيىنىن وتكىزدىك. جاقىندا قاۋىمداستىق قۇرىلادى. سونىمەن وسى ميلليون تەڭگەنى شەتەلدەگى قانداستارعا، موڭعولياداعى ەڭ ءىرى قازاقءتىلدى «Kaznews» پورتالىنا تاپسىراتىن بولدىق»، - دەدى ا. ۋماروۆ.
سايتتىڭ قۇرىلتايشىسى جانە رەداكتورى ومىربەك قاباي ۇلى موڭعوليادان كەلە الماعاندىقتان، سىياقى ونىڭ قازاقستانداعى ىنىسىنە تاپسىرىلدى. 2011 -جىلى موڭعوليادا العاش رەت قازاق تىلىندەگى www.kaznews.mn ۆەبسايتىنىڭ ىرگەتاسى قالانىپ، 9 جىل بويى عالامتوردا موڭعوليا مەن وسى ەلدەگى قازاقتار تۋرالى قازاق تىلىندە اقپارات تاراتىپ كەلەدى. سايتتىڭ قۇرىلتايشىسى دا، شىعارۋشىسى دا - ومىربەك قاباي ۇلى.
سايتقا ەش ۇيىمنان قارجى بولىنبەيدى، ومىربەك قاباي ۇلى ءوز قاراجاتىنا شىعارىپ كەلەدى جانە بۇل موڭعولياداعى جالعىز قازاق سايتى.
KAZNEWS. MN - موڭعوليانىڭ، موڭعوليا قازاقتارىنىڭ، بايان- ولگەي ايماعىنىڭ عالامتورداعى تىنىسى بولا الدى. بۇگىنگە دەيىن 3000 عا جۋىق ماقالا سايتقا جاريالانىپ، عالامتوردا شەتەلدىك قازاق تىلىندەگى كونتەنتتى دامىتۋعا ۇلەس قوستى. ينتەرنەتتە بايان- ولگەي، موڭعوليا قازاقتارى تۋرالى ىلمەكتەر ىزدەۋ جۇيەسىندە جوعارى ورىن الدى. شەتەلدە قازاق ءتىلىنىڭ دامۋىنا ۇلەس قوسۋ، قازاق تىلىندە جاڭالىقتار تاراتىپ، ماقالالار جاريالاۋ باستى ماقساتى بولدى.