اقتوبە وبلىسىندا پوليتسەيلەر %100 پلانشەتپەن قامتاماسىز ەتىلگەن

اقتوبە. قازاقپارات - اقتوبەگە ىشكى ىستەر ءمينيسترىنىڭ ورىنباسارى ارىستانعالي زاپپاروۆ كەلدى. ول پرەزيدەنت جولداۋىنىڭ ەرەجەلەرىن ءتۇسىندىردى،- دەپ حابارلايدى قازاقپارات ءتىلشىسى.

جيىنعا وبلىستىق پوليتسيا دەپارتامەنتى باسقارمالارىنىڭ باستىقتارى، ونلاين رەجيمدە اۋداندىق ءبولىم باسشىلارى قوسىلدى. ىشكى ىستەر ءمينيسترىنىڭ ورىنباسارى ارىستانعالي زاپپاروۆ توتەنشە جاعدايلار مينيسترلىگىن قۇرۋ، ۋچاسكەلىك پوليتسيا ينسپەكتورلارىنىڭ مارتەبەسىن ارتتىرۋ، سيفرلاندىرۋدى دامىتۋ، سىبايلاس جەمقورلىققا قارسى كۇرەس جانە تاعى دا باسقا ماسەلەلەر جايىندا ءسوز قوزعادى.

«پرەزيدەنتتىڭ تاپسىرماسىنا سايكەس توتەنشە جاعدايلار مينيسترلىگى قايتا قۇرىلدى. بۇعان دەيىن ونىڭ فۋنكتسيالارى ءىءى م قۇرامىندا بولعان. جولداۋعا سايكەس ۋچاسكەلىك پوليتسيا ينسپەكتورلارىنىڭ مارتەبەسى ارتادى. بۇل وتە ماڭىزدى. ءاربىر ۋچاسكەلىك ينسپەكتور ءوزى جاۋاپتى بولعان اكىمشىلىك ۋچاسكەدە بەدەلدى، تانىمال ادام بولۋى كەرەك. ءبىز ۋچاسكەلىك پوليتسيا ينسپەكتورىنىڭ ماتەريالدىق- تەحنيكالىق بازاسىن جاقسارتاتىن بولامىز. ۋچاسكەلىك پوليتسيا قىزمەتكەرلەرىنىڭ جالاقىسىنا قوسىمشا اقى تولەنەدى»،-دەدى ول. ا. زاپپاروۆتىڭ ايتۋىنشا، ۋچاسكەلىك پوليتسيا ينسپەكتورلارىنىڭ ماتەريالدىق- تەحنيكالىق بازاسىن جاقسارتۋ، ولاردى جۇمىس ىستەۋ ءۇشىن كولىكپەن جانە پلانشەتپەن قامتاماسىز ەتۋ جوسپارلاندى. اقتوبە وبلىسىندا پوليتسەيلەر % 100 اۆتوكولىكپەن جانە پلانشەتپەن قامتاماسىز ەتىلگەن.

جالپى ەل بويىنشا پەنيتسيارلىق مەكەمەلەردە، پوليتسيانىڭ قىزمەتتىك ءۇي- جايلارىندا جاپپاي بەينەباقىلاۋ قوندىرىلىپ جاتىر.

ا. زاپپاروۆ تسيفرلاندىرۋدى دامىتۋ كەزىندە ءىءى م كورسەتەتىن مەملەكەتتىك قىزمەتتەر تسيفرلىق فورماتقا اۋىستىرىلاتىنى تۋرالى ايتىپ بەردى.

ايتا كەتەيىك، سىبايلاس جەمقورلىققا قارسى كۇرەس جۇمىسى جالعاسىپ جاتىر. سوڭعى 3 جىل ىشىندە ءىءى م - دە سىبايلاس جەمقورلىق فاكتىسى 33 پايىزعا تومەندەدى. وڭىرلەردە قوعامدىق قابىلداۋ جۇرگىزىلەدى. ءىءى م رەفورماسى ءۇشىن ازاماتتاردان ۇسىنىس قابىلداۋعا ارنالعان مەدياپورتالى ىسكە قوسىلدى.

وبلىستىق پ د باستىعى اتىعاي ارىستانوۆ پرەزيدەنتتىڭ جولداۋى اپپاراتتىق كەڭەستە قارالىپ، بارلىق باعىتتى ورىنداۋ بويىنشا جوسپار دايىندالعانىن ايتتى.

«ەڭ باستىسى - ۋچاسكەلىك پوليتسيا قىزمەتىنىڭ جۇمىسىن قايتا قۇرۋ، ولاردىڭ قوعام يگىلىگى ءۇشىن جانە ازاماتتاردىڭ قوعامدىق ءتارتىبى ءۇشىن جۇمىس ىستەۋىن قامتاماسىز ەتۋ»،-دەدى ا. ارىستانوۆ.