ەلباسى «قازاقپارات» حالىقارالىق اقپارات اگەنتتىگىن 100 جىلدىق مەرەيتويىمەن قۇتتىقتادى
«قازاقپارات» حالىقارالىق اقپارات اگەنتتىگىن 100 جىلدىق مەرەيتويىمەن شىن جۇرەكتەن قۇتتىقتايمىن. اگەنتتىك ءارقاشان تالانتتى ماماندار مەن وتاندىق مەديا سالاسىنىڭ كاسىپقوي قىزمەتكەرلەرىنىڭ وراسى بولىپ كەلەدى. كوپشىلىگى مەنىڭ ەسىمدە جانە ولاردىڭ ءوز جۇمىسىنا شىعارماشىلىق ءارى ساۋاتتى كورقاراسپەن قاراعانى ءۇشىن قۇرمەتتەيمىن. جۋرناليستىك شەبەرلىكتىڭ يگى داستۇرلەرىن ساقتاي وتىرىپ، «قازاقپارات» ەگەمەندىك جىلدارى قازاقستانداعى جەتەكشى باسپا ءسوز قۇرالدارىنىڭ بىرىنە اينالا ءبىلدى. اگەنتتىك ەلدە جانە الەمدە بولىپ جاتقان وقيعالار تۋرالى شىنايى اقپاراتتى جەدەل تاراتۋ ارقىلى مەملەكەتىمىزدىڭ الەۋمەتتىك جانە قوعامدىق- ساياسي ءومىرىنىڭ دامۋىنا ەلەۋلى ۇلەس قوسۋدا.
«قازاقپارات» ءوزىنىڭ 100 جىلدىق مەرەيتويىن حالىقارالىق دەڭگەيدەگى رەسۋرستاردىڭ ءبىرى رەتىندە اتاپ وتۋدە. بۇل - ءوز ىسىنە قۇشتار ۇلكەن كاسىپقوي ۇجىمنىڭ ۇيلەسىمدى جۇمىسىنىڭ ناتيجەسى. اگەنتتىكتىڭ كاسىبي قىزمەتى بۇگىنگى الماعايىپ كەزەڭدە دە ايرىقشا ماڭىزدى. «قازاقپاراتتىڭ» بارشا ۇجىمىنا مىقتى دەنساۋلىق، شىعارماشىلىق شابىت، باق- بەرەكە جانە تاۋەلسىز قازاقستاننىڭ يگىلىگى جولىنداعى قىزمەتىنە تابىس تىلەيمىن!