تەلەگراف اگەنتتىگىنەن مەدياحولدينگكە دەيىن - قازاقپاراتتىڭ 100 جىلدىق تاريح جولى
تاريحى سوناۋ 1920-جىلدىڭ 13- تامىزىندا ورىنبور قالاسىندا قۇرىلعان ساتتەن باستالاتىن اگەنتتىك عاسىرلىق جولىندا قازاقستاننىڭ استاناسى بولعان قىزىلوردا، الماتى قالالارىنا كوشىپ، بۇگىندە نۇر-سۇلتان قالاسىنا قونىستانعان.
قازاقستان اۋماعىنداعى ءبىرىنشى اقپارات اگەنتتىگى ورىنبوردا رەسەي تەلەگراف اگەنتتىگىنىڭ (روستا) ورىنبور-تورعاي بولىمشەسى رەتىندە قۇرىلدى. ودان كەيىن اتاۋى سان مارتە وزگەرىپ، قىرروستا، قازروستا بولسا، 1937-جىلدان اگەنتتىك قازتاگ دەپ اتالدى جانە ت ا س س- تىڭ - كەڭەس وداعى تەلەگراف اگەنتتىگىنىڭ قۇرامىندا بولدى.
قازاقستان تاۋەلسىزدىك العاننان كەيىن 1991-جىلدىڭ شىلدەسىندە تەك رەسپۋبليكا ۇكىمەتىنە عانا باعىناتىن قازاق مەملەكەتتىك اقپارات اگەنتتىگى - قازتاگ رەتىندە قايتا جاساقتالدى. ال 6 جىل وتكەننەن كەيىن قازتاگ بازاسىندا «قازاق اقپارات اگەنتتىگى» قاز ا ا گ قۇرىلدى.
2002-جىلى «قازاق اقپارات اگەنتتىگى» ۇلتتىق كومپانياسى» اكتسيونەرلىك قوعامىنا اينالدى. سول جىلدىڭ 22- قاڭتارىندا اگەنتتىكتىڭ پورتالى العاش رەت جۇمىس ىستەي باستادى. بۇل اگەنتتىك اتاۋىنىڭ سوڭعى رەت وزگەرتىلۋى ەمەس ەدى. 2019-جىلدىڭ جەلتوقسانىندا بۇعان دەيىن جەكە كومپانيا رەتىندە جۇمىس ىستەگەن «قازكونتەنت» ا ق- پەن بىرىگىپ، «قازاقپارات» حالىقارالىق اقپارات اگەنتتىگى» اكتسيونەرلىك قوعامى قۇرىلدى.
قازىرگى ساتتە «قازاقپارات» - بۇل حالىقارالىق دەڭگەيدەگى مارتەبەسىن العان قازاقستانداعى ءبىرىنشى، جەتەكشى مەملەكەتتىك اقپارات اگەنتتىگى. ول 100 جىل بويى ساياسات، ەكونوميكا، ءبىلىم، دەنساۋلىق، سپورت، مادەنيەت جانە قوعام تىنىس-تىرشىلىگى تۋرالى سەنىمدى ءارى جەدەل اقپارات كوزى رەتىندە بەدەلىن مۇلتىكسىز ساقتاپ كەلەدى.
قازاقپارات ارقىلى پرەزيدەنت اكىمشىلىگى، پارلامەنت، ۇكىمەت، وڭىرلىك بيلىك ورگاندارىنىڭ، ۇلتتىق قارجىلىق جانە ونەركاسىپ قۇرىلىمداردىڭ قىزمەتى تۋرالى رەسمي اقپارات تارالادى. بۇگىندە اگەنتتىكتىڭ جاڭالىقتارى inform.kz web-پورتالىندا قازاق، ورىس، اعىلشىن، قىتاي جانە وزبەك تىلدەرىنە تاراتىلادى. بۇعان قوسا مەملەكەتتىك تىلدەگى ماتەريالدار شەتەلدەگى قانداستارىمىز ءۇشىن لاتىن الىپبيمەن جانە توتە جازۋمەن دە بەرىلىپ وتىرادى.
قازاقپاراتتا وزگە وتاندىق اقپارات اگەنتتىكتەرىندە جوق تىلشىلەر جەلىسى بار. ەلدىڭ بارلىق ايماقتارىندا 15 تىلشىلەر پۋنكتى ورنالاسقان. رەسەي، قىتاي، تۇركيا، ەۋروپا، ازەربايجان، وزبەكستان، قىرعىزستان، تاياۋ شىعىس ەلدەرىندە مەنشىكتى تىلشىلەرى بار.
بۇل ەلىمىزدە جانە الەمدە بولىپ جاتقان جاڭالىقتاردى جەدەل ءارى شىنايى تاراتۋعا مۇمكىندىك بەرەدى. بۇگىندە قازاقستاندىق جاڭالىق تاراتاتىن ينتەرنەت- رەسۋرستار اراسىندا قازاقپارات ۇزدىك وندىقتىڭ قاتارىنا كىرەدى.
Web-پورتالعا ورتاشا ەسەپپەن العاندا 100 مىڭ ادام كىرەدى. اگەنتتىك پورتالىن پايدالانۋشىلاردىڭ گەوگرافياسى مەن اۋقىمى تاڭ قالدىرادى، ول 229 ەلدى قامتيدى. بۇگىنگى تاڭدا قازاقپارات الەۋمەتتىك جەلىلەردە بەلسەندى جۇمىس جۇرگىزەدى. Facebook، ۆكونتاكتە، Twitter، ودنوكلاسسنيكي، Instagram الەۋمەتتىك جەلىلەرىندەگى ارنالار مەن پاراقشالارىنا جازىلۋشىلاردىڭ جيىنتىق سانى 300000 ادامنان اسىپ تۇسەدى. قازاقپارات ۇجىمى - بۇل بەلگىلى تەلە-جانە راديوجۋرناليستەر، قازاقستان رەسپۋبليكاسى پرەزيدەنتى سىيلىعىنىڭ لاۋرەاتتارى، حالىقارالىق جانە ايماقتىق كونكۋرستاردىڭ جەڭىمپازدارى، قۇرمەت اتاقتارى مەن سىيلىقتارىنىڭ يەگەرلەرى. اگەنتتىك وڭىردە ەڭ ءبىرىنشى بولىپ حالىقارالىق مارتەبە الىپ، 2015-جىلدىڭ جەلتوقسانىندا ISO 9001:2008 ستاندارتى تالاپتارى بويىنشا ساپا مەنەدجمەنتى جۇيەسىنىڭ سەرتيفيكاتتاۋىنان ءوتتى.
OAHA حالىقارالىق اقپارات اگەنتتىكتەرى قاۋىمداستىعىنىڭ (تىنىق مۇحيتى جانە ازيا ەلدەرى اقپارات اگەنتتىكتەرىنىڭ ۇيىمى)، ت م د ەلدەرىندەگى ۇلتتىق اقپارات اگەنتتىكتەرى قاۋىمداستىعىنىڭ (ۇ ا ا ق)، تۇركى تىلدەس ەلدەردەگى اقپارات اگەنتتىكتەرى ۇيىمىنىڭ (ت ك ا)، تۇركىسوي حالىقارالىق ۇيىمىنىڭ، ورىس باسپا ءسوزىنىڭ بۇكىلالەمدىك قاۋىمداستىعىنىڭ، بۇكىل الەمدىك گازەت قاۋىمداستىعىنىڭ (WAN IFRA) مۇشەسى قازاقپاراتتىڭ بۇگىندە الەمنىڭ كوپتەگەن ەلدەرىندە مەديا سەرىكتەستەرى بار.