الماتى اۋرۋحانالارىنا كۇن سايىن كوروناۆيرۋسپەن 100 دەن استام ناۋقاس تۇسەدى
ول دەنساۋلىق ساقتاۋ جۇيەسىنىڭ رەسۋرستارى شەكسىز ەمەس ەكەنىن جانە بۇل رەسۋرستار دامىعان ەلدەردە دە تاپشى ەكەنىن اتاپ ءوتتى.
«اۋرۋدىڭ ءوسۋى بايقالادى. سوڭعى كۇندەرى قالالىق اۋرۋحانالارعا كۇن سايىن 100 دەن استام پاتسيەنت قابىلدانىپ وتىر. ال كلينيكانىڭ ورتاشا سىيىمدىلىعى 200-300 كەرەۋەتتى قۇرايدى. سايكەسىنشە، سۇرانىستى قاناعاتتاندىرۋ ءۇشىن ءار ءۇش كۇن سايىن ينفەكسيالىق اۋرۋحانانى اشۋ قاجەت. بۇل - ارينە، مۇمكىن ەمەس. بۇگىنگى تاڭدا قالادا Covid-19 ناۋقاستارىن ەمدەۋ ءۇشىن 10 كلينيكا قىزمەت كورسەتەدى. قازىر 1300 دەن استام پاتسيەنت ەم قابىلداپ جاتىر. قولدانىستاعى كلينيكالاردى كوروناۆيرۋستى ەمدەۋ ءۇشىن قايتا قۇرۋ مۇمكىن ەمەس.
ويتكەنى ولار باسقا پاتولوگيالاردان (ينفاركت، ينسۋلت، اپپەنديتسيت جانە ت. ب. ) ءومىردى ساقتايدى. كۇن سايىن قالادا 2500 دەن استام توتەنشە جاعداي ورىن الادى. اڭگىمە تەك بوس توسەك ورنى تۋرالى عانا ەمەس، سونىمەن بىرگە ەمدەلۋشىلەرمەن جۇمىس ىستەۋگە دايىن مەديتسينالىق توپتار تۋرالى بولىپ وتىر»، - دەپ جازدى كامالجان نادىروۆ.
سونىمەن قاتار، ول وكىنىشكە وراي، دارىگەرلەر تەك ورتاشا جانە اۋىر دارەجەلى ناۋقاستاردى ىرىكتەپ، اۋرۋحاناعا جاتقىزۋعا ءماجبۇر ەكەنىن اتاپ ءوتتى. ونىڭ ايتۋىنشا، العاشقى مەديتسينالىق كومەك دارىگەرلەرىنە جۇكتەمە دە ايتارلىقتاي ارتتى.
«وسى ۆيرۋستىڭ ناقتى ەمى بولماعانىنا قاراماستان، دارىگەرلەر بارىن سالۋدا. سوندىقتان ءبىز تۇرعىنداردى مامانداردىڭ ۇسىنىستارىن ەسكەرىپ، ويلانۋعا شاقىرامىز»، - دەپ تولىقتىردى الماتى قوعامدىق دەنساۋلىق ساقتاۋ دەپارتامەنتىنىڭ باسشىسى.