نۇر-سۇلتاندا ءبىرىنشى كەزەڭدە 100 اسكەري مىندەتتى شاقىرىلدى

نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆتىڭ جارلىعىنا سايكەس ەلوردادا اسكەري مىندەتتىلەر ءتىزىمى قۇرىلىپ، اسكەرگە شاقىرىلدى.

بۇگىن ەلوردا اكىمى التاي كولگىنوۆ پەن قورعانىس ءمينيسترىنىڭ ءبىرىنشى ورىنباسارى - ق ر ق ك باس شتابىنىڭ باستىعى مۇرات بەكتانوۆ اسكەري مىندەتتى-ەرىكتىلەرمەن كەزدەستى، دەپ حابارلايدى قازاقپارات قالا اكىمىنىڭ رەسمي سايتىنا سىلتەمە جاساپ.

ءبىرىنشى كەزەڭدە 100 اسكەري مىندەتتى شاقىرىلدى. ولاردىڭ بارلىعى - اسكەري مىندەتتى ۆولونتەرلەر. قاجەت بولعان جاعدايدا ولاردىڭ سانى ۇلعايتىلادى. اسكەري مىندەتتىلەر قاتارىندا- بەلگىلى قازاقستاندىق بوكسشى، «كوك تۋدىڭ جەلبىرەگەنى» ءانىنىڭ اۆتورى جانە ورىنداۋشىسى يبراگيم ەسكەندىر دە بار.

«حالىق ءارقاشان شىعارماشىلىق ادامدارىن، سپورتشىلاردى قولدايدى. ءبىز بۇل قولداۋدى سەزىنەمىز. حالقىما قىزمەت ەتۋگە دايىنمىن. مەن زاپاستاعى لەيتەنانتپىن، بوكسپەن اينالىساتىندىقتان فيزيكالىق تۇرعىدا ءتوزىمدىمىن. مەملەكەت باسشىسىنىڭ اسكەري مىندەتتىلەردى ارناۋلى اسكەري جيىنعا شاقىرۋ تۋرالى جارلىعىن ەستىگەندە ەش كۇمانسىز بىردەن ەلورداداعى اسكەري كوميسسارياتقا كەلدىم. مەديتسينالىق تەكسەرۋدەن ءوتتىم، قىزمەتكە دايىنمىن»، - دەيدى يبراگيم ەسكەندىر.

قالا اكىمى التاي كولگىنوۆ اتاپ وتكەندەي، اسكەري مىندەتتىلەردىڭ نەگىزگى مىندەتتەرى - كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى جەدەل شتاب جۇمىسىنا قاتىسۋ، وتكىزۋ-باقىلاۋ بەكەتتەرىندە قىزمەت اتقارۋ، قالا اۋماعىنا دەزينفەكتسيا جۇرگىزۋ، ينفەكتسيا وشاقتارى انىقتالعان نىسانداردى كۇزەتۋ.

اسكەري مىندەتتىلەر تاماقپەن، كيىم-كەشەكپەن، سونداي-اق ەڭبەكاقىمەن تولىقتاي قامتاماسىز ەتىلدى.