تۇركىستاندىق «100 جاڭا ەسىمگە» ەنگەن كاسىپكەر جالعىزباستى اناعا باسپانا سىيلادى
باسپانا تاۋقىمەتىن تارتقان جالعىزباستى انا ايگۇل سادىقوۆا ءۇش بالاسىمەن بىرگە جىلدار بويى اۋىلداعى عيماراتتىڭ بولمەسىن جالداپ كەلگەن.
جانۇياعا تۇراقتى قامقورلىق كورسەتىپ كەلگەن قازىعۇرت اۋدانىنىڭ باسشىلىعى ولارعا دەمەۋشى تاۋىپ بەردى. جەرگىلىكتى كاسىپكەر قولىندا مۇمكىندىگى شەكتەۋلى بالا بار ا. سادىقوۆاعا 4 بولمەلى ءۇي سالىپ بەردى.
«بولاشاق» مولتەك اۋدانىندا ورنالاسقان جاڭا ءۇي جارىقپەن جانە تابيعي گازبەن قامتىلىپ، اۋىزسۋ تارتىلعان. وڭىردە قارقىن العان «قامقورلىق» جوباسى اياسىندا قازىعۇرت اۋىلىنىڭ كاسىپكەرلەرى جۇمىسسىز انانىڭ جاڭا قونىسىنا ءۇي- جيھازدارىن تارتۋ ەتىپ، ازىق- تۇلىك الىپ بەردى.
باسىبايلى باسپانا بۇيىرعان وتباسىنداعى بالالاردىڭ قۋانىشىندا شەك جوق. جىلدار بويعى قيىندىقتان ارىلعان جانداردىڭ ايتار العىسى مول.
«قازاقستانداعى 100 جاڭا ەسىم» قاتارىنا شىنايى ەل پاتريوتى رەتىندە ەنگەن قازىعۇرت اۋدانىنىڭ كاسىپكەرى سىرىم ەرتايەۆ وسىعان دەيىن دە بىرنەشە جەرلەسىنە باسپانا سىيلاپ، جومارتتىعىمەن تانىلعان. ۇلگى بولار ىسىمەن العىس ارقالاعان ازامات جەكە كاسىبىن دوڭگەلەتىپ، كوپتەگەن تۇرعىندى تۇراقتى جۇمىسپەن قامتىپ وتىر.
تۇركىستان وبلىسىندا جۇزەگە اسىپ جاتقان «قامقورلىق» باعدارلاماسى وزىڭدە باردى وزگەمەن ءبولىسۋ، مۇقتاج، كوڭىلى جارىم جاندارعا قول ۇشىن بەرۋدى مەڭزەيدى. قازىعۇرت اۋدانى بويىنشا 86 وتباسىنا وسى باعدارلاما اياسىندا جەتەكشى بەكىتىلىپ، جان- جاقتى كومەك كورسەتىلگەن. اق تىلەۋلى ازاماتتار الەۋمەتتىك جاعدايى تومەن جاندارعا تۇرمىسقا قاجەتتى زاتتارىن، كومىر، وتىنىن مولىنان ۇيلەستىرۋدە.
اتالعان شاراعا اۋدان، قالا جانە اۋىل اكىمدىكتەرى، «Nur Otan» پارتياسى تۇركىستان وبلىستىق فيليالىنىڭ بەلسەندىلەرى، ءماسليحات دەپۋتاتتارى مەن كاسىپكەرلەر دەمەۋشىلىك جاساپ، اتسالىسىپ جاتىر. جالپى، وبلىس بويىنشا 2 مىڭعا جۋىق وتباسىنا جوبا اياسىندا جان-جاقتى قامقورلىق جاسالماق.
