تالدىقورعاندا 100 دەن اسا جاياۋ جۇرگىنشى ايىپپۇل تولەدى
ولاردىڭ قاتارىندا جۇرگىزۋشىلەر مەن جاياۋ جۇرگىنشىلەر بار، دەپ حابارلايدى قازاقپارات ءتىلشىسى.
«جاياۋ جۇرگىنشىگە جول بەرمەگەن كولىك جۇرگىزۋشىسىنە 10 اەك كولەمىندە ايىپپۇل سالىنادى. ال، ەندى جاياۋ جۇرگىنشىلەر بەلگىلەنبەگەن جەردەن ءوتىپ، ياعني جول ەرەجەسىن بۇزعان جاعدايدا ولارعا 615-بابتىڭ 1-تارماعى بويىنشا 5 اەك كولەمىندە ايىپپۇل كوزدەلگەن»، - دەدى قالالىق ءى ءى ب جول پوليتسيا قىزمەتىنىڭ اعا ينسپەكتورى قۇمار سمايلوۆ.
«جاياۋ جۇرگىنشى» جەدەل-الدىن الۋ شاراسىنا شاھاردان 30 دان اسا جول پوليتسيا قىزمەتكەرى جۇمىلدىرىلدى. ولار حالىق كوپ شوعىرلانعان اۋماقتا تۇسىندىرمە جۇمىستارىن جۇرگىزدى. 300 گە جۋىق جادناما تاراتىپ، حالىقتى جول ءجۇرۋ ەرەجەسىن ساقتاۋعا شاقىردى. جالپى ءتارتىپ ساقشىلارىنىڭ اقپاراتىنا سايكەس، تالدىقورعاندا جىل باسىنان بەرى 23 جول-كولىك وقيعاسى تىركەلگەن. سالدارىنان 1 ادام قازا تاۋىپ، 30 ى جاراقات العان. جول پوليتسيالارىنىڭ مالىمەتىنشە، الدىن الۋ ءىس-شاراسى وڭ ناتيجە بەرىپ وتىر. ماسەلەن، بىلتىرعى كورسەتكىشپەن سالىستىرعاندا جول-كولىك اپاتى 10 پايىزعا تومەندەدى.
«جۇرگىزۋشىلەر جولدا بەلگىلەنگەن جىلدامدىقپەن ءجۇرۋى قاجەت. باعدارشامدا قىزىل جانعاندا ءجۇرىپ كەتپەۋى ءتيىس. بۇل ايتىلعان ەسكەرتۋلەر جاياۋ جۇرگىنشىلەردىڭ قاتىسۋىمەن ورىن الاتىن اپاتتاردىڭ الىن الادى. ال جاياۋ جۇرگىنشىلەر جولدى رۇقسات ەتىلمەگەن جەردەن وتپەۋى قاجەت. وسى ارەكەت سوڭى قايعىلى جاعدايعا اكەلەدى. سوندىقتان جول ءجۇرۋ ەرەجەلەرىنە ساق بولىڭىزدار!»، - دەدى تالدىقورعان قالالىق ءى ءى ب ج پ ق ينسپەكتورى ايبەك مۇساعاليەۆ.