بيىل بالاباقشامەن قامتۋ 100 پايىزعا جەتكىزىلەدى
«قازاقستان رەسپۋبليكاسى ەڭبەك كودەكسىنىڭ 99-بابى 1-تارماعىنىڭ 3) تارماقشاسىنا سايكەس بالا ءۇش جاسقا تولعانعا دەيىن ونىڭ كۇتىمىنە اقى تولەنبەيتىن دەمالىس بەرىلەدى. ءبىزدىڭ نەگىزگى مىندەتىمىز بەلسەندى جۇمىسپەن قامتىلۋىنا جانە كاسىپكەرلىكپەن اينالىسۋىنا مۇمكىندىك جاساي وتىرىپ، جاعدايى تومەن جانە كوپبالالى وتباسىلارعا الەۋمەتتىك كومەك كورسەتۋ، ونىڭ ىشىندە ولاردىڭ ەڭبەك الەۋەتىن ىنتالاندىرۋ. 3 جاستان 6 جاسقا دەيىنگى بالالاردى بالاباقشالاردا ورىندارمەن قامتاماسىز ەتۋ دەڭگەيى 2019 -جىلدىڭ سوڭىندا 98,5 پايىزدى قۇراعانىن اتاپ وتكەن ءجون. وسى جىلى قازاقستان رەسپۋبليكاسىندا ءبىلىم جانە عىلىمدى دامىتۋدىڭ 2020-2025 -جىلدارعا ارنالعان مەملەكەتتىك باعدارلاماسىنىڭ اياسىندا بۇل كورسەتكىشتى 100 پايىزعا جەتكىزۋ جوسپارلانۋدا» ، - دەدى اسقار مامين.
ايتا كەتەيىك، سەناتتىڭ ءبىر توپ دەپۋتاتى ۇكىمەت باسشىسىنا جولداعان رەسمي ساۋالدارىندا حالىقپەن كەزدەسۋلەر بارىسىندا كوپبالالى وتباسىلارداعى بالالاردى تاربيەلەۋدەن جۇمىسقا شىعۋ مۇمكىندىگىنىڭ بولماۋىنا جانە كوپتەگەن اۋىلدىق ەلدى مەكەندەردە مەكتەپكە دەيىنگى ءبىلىم بەرۋ ۇيىمدارىنىڭ بولماۋى مەن جەتىسپەۋىنە بايلانىستى جەتى جاسقا دەيىنگى بالانى كۇتۋدى جۇزەگە اسىراتىن تۇلعالارعا شارتسىز جانە شارتتى اقشالاي كومەك تۇرىندە اتاۋلى الەۋمەتتىك كومەك كورسەتۋدىڭ بۇرىنعى تارتىبىنە قايتا كەلۋدى ءوتىنىپ جاتقاندىعىن ايتادى.