قاراعاندى اكىمى ەسەپتىك كەزدەسۋدە 100 گە جۋىق سۇراققا جاۋاپ بەردى

قاراعاندى. قازاقپارات - جەڭىس قاسىمبەك قاراعاندى وبلىسىنىڭ اكىمى لاۋازىمىندا تۇرعىندارمەن العاشقى ەسەپ بەرۋ كەزدەسۋىن وتكىزدى.

ءوڭىر باسشىسى ەكونوميكالىق جانە الەۋمەتتىك سالالاردا اتقارىلعان جۇمىستاردى باياندادى، تۇرعىنداردى تولعاندىراتىن وزەكتى ماسەلەلەرگە توقتالدى، دەپ حابارلايدى قازاقپارات ءتىلشىسى.

باياندامادان كەيىن وبلىس اكىمى اۋديتوريانىڭ سۇراقتارىنا جاۋاپ بەردى. كەزدەسۋگە قاتىسۋشىلاردان 75 سۇراق كەلىپ ءتۇستى. ساۋالداردىڭ تاقىرىبى ءار ءتۇرلى بولدى: اباتتاندىرۋ، كوگالداندىرۋ، كولىك جۇمىسى، ەكولوگيا، مەديتسينالىق قىزمەت كورسەتۋ، جول جاعدايى، تكش ماسەلەلەرى جانە تاعى باسقا.

سونداي-اق اكىم ەسەپ بەرگەن ۋاقىتتا call-ورتالىق جۇمىس ىستەدى. تەلەفون جەلىسىنە 11 سۇراق كەلىپ ءتۇستى.

شاراعا سەلەكتورلىق رەجيمدە شالعايداعى قالالار مەن اۋدانداردىڭ تۇرعىندارى دا قاتىستى. جەزقازعان، ساتبايەۆ، بالقاش، تەمىرتاۋ قالالارى، شەت جانە وساكاروۆ اۋداندارىنان سۇراقتار قويىلدى.

«بىردە- ءبىر ءوتىنىش نازاردان تىس قالمايدى»، - دەپ سەندىردى جەڭىس قاسىمبەك.

ەسەپتىك كەزدەسۋدەن كەيىن وبلىس اكىمى ازاماتتاردى جەكە ماسەلەلەرى بويىنشا قابىلدادى. 21 ادامنىڭ ءوتىنىش- تىلەكتەرى تىڭدالدى. ماسەلەلەر اباتتاندىرۋ، كاسىپكەرلىك، كومىر سالاسىنىڭ بولاشاعىنا قاتىستى بولدى. ءوز پروبلەمالارىن ساياجاي قوعامدارىنىڭ جەتەكشىلەرى دە ايتىپ بەردى. كىشكەنتاي بالاسىنىڭ رەسپۋبليكالىق كلينيكادا تەكسەرۋدەن ءوتۋ كۆوتاسىن جەدەلدەتۋگە كومەك سۇراعان تۇرعىن دا بولدى. قابىلداۋعا باسقارما باسشىلارى قاتىستى، ولارعا ءار ماسەلە بويىنشا جەڭىس قاسىمبەك جەكە تاپسىرما بەردى.