20:51, 15 - قاڭتار 2020 | GMT +6
ورمان ورتىنەن كەيىن اۆستراليانىڭ قالپىنا كەلۋىنە 100 جىل قاجەت
نۇر-سۇلتان. قازاقپارات - اۆسترالياداعى كۇزدەن بەرى اۋىزدىقتالماي جاتقان ورمان ورتىنەن كەيىن ەلدەگى جاعدايدى قالپىنا كەلتىرۋ ءۇشىن 100 جىل قاجەت.
بۇل تۋرالى بريتاندىق The Sun باسىلىمى جازدى.
ساراپشىلاردىڭ پىكىرىنشە، ءورت سالدارىنان اۆستراليا ورماندارىنداعى كوالالاردىڭ ۇشتەن ءبىرى قىرىلىپ قالدى. سونىمەن قاتار جانۋارلاردىڭ كەم دەگەندە 13 ءتۇرى جويىلىپ كەتكەن. اۆسترالياداعى ورمان ءورتى 2019 -جىلدىڭ قىركۇيەك ايىندا باستالعان بولاتىن. اۆستراليادا 4 ايدان بەرى جالعاسىپ جاتقان ءورت تابيعاتقا ايتارلىقتاي شىعىن اكەلدى.
1 ميلليون گەكتاردان اسا جەر كۇلگە اينالىپ، جارتى ميلليارد جۋىق جانۋار قىرىلىپ قالعان. اۆسترالياداعى ءورتتىڭ ءتۇتىنى وڭتۇستىك امەريكاعا جەتتى. اۆستراليا بيلىگى بۇلىنگەن ورمان القاپتارىن قالپىنا كەلتىرۋگە كۇش سالماق.
www.24.kz