موبيلدى ويىن جاساۋشى جىگىت «100 جاڭا ەسىم» جوباسىندا قالاي جەڭىمپاز اتاندى
ول «قازاقپارات» تىلشىسىنە بۇل جوبا مەن ءوزىنىڭ جۇمىسى تۋرالى ايتىپ بەردى.
شىمكەنت قالاسىنىڭ تۇرعىنى - ونلاين موبيلدى ويىندار جاساۋشى. ول 10 جىلدان بەرى قىتايدا تۇرادى. قازىرگى ۋاقىتتا قىتايداعى بەدەلدى IT كومپانيانىڭ بىرىندە ءموبيلدى ويىندار مەن قوسىمشانىڭ پروديۋسەرى.
«مەن «100 جاڭا ەسىم» جوباسىنا سانالى تۇردە قاتىستىم. قاتىسۋ ءۇشىن شىمكەنت قالاسىنان ءوتىنىم جىبەردىم. جەتكىلىكتى داۋىس جينالدى. قازاقستاندىقتارعا قولداۋى ءۇشىن العىس ايتقىم كەلەدى. ەلباسى نۇرسۇلتان ءابىش ۇلى نەگىزىن قالاعان جوبانىڭ جەڭىمپازى بولىپ، ءوز قالامنىڭ اتىنان قاتىسۋ - مەن ءۇشىن ۇلكەن مارتەبە. بۇل ءبىزدىڭ كاسىپكەرلەردىڭ ءموبيلدى قوسىمشالاردى جاساپ شىعارۋعا دەگەن قىزىعۋشىلىعىن ارتتىرىپ، IT سالاسىنا، موبيلدى ويىندار مەن قوسىمشالاردى باعدارلامالاۋعا ينۆەستيتسيا قۇيۋعا سەبەپشى بولادى. بۇل جوبا ماعان ءوز جەتىستىگىم تۋرالى ايتۋعا، ۇلگى بولۋعا، قول قۋسىرىپ وتىرماي، وزىڭە سەنۋگە ۇيرەتۋگە مۇمكىندىك بەردى»، - دەپ اتاپ ءوتتى الديار جۇماجانوۆ.
ول «ۇلى سۇلتان»، «ۇيقى شەبەرى» سياقتى موبيلدى ويىنداردى جاساعان.
«ۇلى سۇلتان» موبيلدى ستراتەگياسى ءوزىڭدى وسمان يمپەرياسىنىڭ بيلەۋشىسى سەزىنۋىڭە مۇمكىندىك بەرەدى. ءسىز مەملەكەتتى باسقارىپ، اسكەري جورىقتارعا قاتىسىپ، يمپەريانى كەڭەيتە تۇسەسىز. مەملەكەتتى گۇلدەندىرۋ وڭاي ەمەس: دۇرىس شەشىم قابىلداپ، كەڭەسشىلەر تاعايىنداپ، وزگە مەملەكەتتەرمەن سوعىسۋىڭىز كەرەك، - دەيدى ول.
اتالعان قوسىمشا قازىرگى ۋاقىتتا AppStore جانە Google PlayMarket موبيلدى دۇكەندەردە ساتىلادى. بۇگىنگە دەيىن بۇل ويىن 20 ميلليون رەت جۇكتەلگەن.
«مەن ويىننىڭ كونتسەپتسياسىن جاسادىم. باسقا قۇرامداس بولىگى جانە جارناما بويىنشا كوماندامەن بىرگە جۇمىس ىستەدىك. ت م د نارىعىندا ويىندى ناسيحاتتاپ، لوكاليزاتسياسىن جاساپ، كومپانيانىڭ س م م ءبولىمىن باسقاردىم» ، - دەيدى الديار.
قازىرگى ۋاقىتتا ولار الەم بويىنشا العاشقى بولىپ ەجەلگى قازاقستان تۋرالى «ۇلى حان» اتتى 3D- موبيلدى ويىنىن قۇراستىرىپ جاتىر.
«بۇل جوبا قازاقستاندىق كاسىپكەرلەردىڭ قىزىعۋشىلىعىن وياتادى دەپ ۇمىتتەنەم. ءبىزدىڭ ەلدە IT يندۋستريا دامىعانىن قالايمىن»، - دەيدى الديار جۇماجانوۆ.
ەسكە سالا كەتسەك، جاقىندا ەلوردادا اتالعان جوبا اياسىندا سالتاناتتى شارا وتكەن بولاتىن.
اۆتور: زارينا قاھارمان