الماتى قاشان 100 ۇزدىك قالانىڭ قاتارىنا كىرەدى
بۇل تۋرالى بۇگىن وتكەن بريفينگ بارىسىندا قالالىق ستراتەگيا جانە بيۋدجەت باسقارماسىنىڭ باسشىسى نۇرتاس قايىروۆ مالىمدەدى، دەپ حابارلايدى قازاقپارات ءتىلشىسى.
ونىڭ ايتۋىنشا، «الماتى-2050» ستراتەگياسى وسى مەجەگە جەتۋگە مۇمكىندىك بەرەدى.
«بازالىق رەيتينگ رەتىندە ءبىز «Mercer» رەيتينگىسىن الامىز. بۇگىندە الماتى بۇل رەيتينگ بويىنشا 177-ورىندا تۇر. الماتىنىڭ 2050 -جىلعا دەيىنگى ستراتەگياسىنىڭ ماقساتى بيىك قۇجات. 2 ونجىلدىقتا جوسپارعا سايكەس قالا الەمدەگى ءومىر ءسۇرۋ ساپاسى جاعىنان ەڭ ۇزدىك 100 قالانىڭ ىشىنە كىرەدى»، - دەدى قالالىق ستراتەگيا جانە بيۋدجەت باسقارماسىنىڭ باسشىسى نۇرتاس قايىروۆ.
ونىڭ ايتۋىنشا، الداعى 5 جىلدا قالانىڭ شەتكى اۋداندارىن دامىتۋعا 800 ميلليارد تەڭگە جۇمسالادى. بۇل قاراجاتقا الاتاۋ جانە ناۋرىزباي اۋدانىندا ينفراقۇرىلىمدىق جەلىلەرى جۇرگىزىلەدى.
ايتا كەتۋ كەرەك، الماتى اكىمى باقىتجان ساعىنتايەۆ كەشە قالانىڭ 2050 -جىلعا دەيىنگى دامۋ ستراتەگياسىن جاريالاعان بولاتىن. قۇجاتقا سايكەس، قالا 30 جىلدا 7 باعىت بويىنشا داميتىن بولادى.