ماڭعىستاۋ اكىمى 100 گە جۋىق تۇرعىندى قابىلدادى

اقتاۋ. قازاقپارات - ازاماتتاردى ءبىرىڭعاي قابىلداۋ كۇنى اياسىندا ماڭعىستاۋ وبلىسىنىڭ اكىمى سەرىكباي ترۇموۆ تۇرعىندارمەن جۇزدەستى، - دەپ حابارلايدى قازاقپارات ءتىلشىسى.

بۇل شارا قازاقستان پرەزيدەنتى قاسىم جومارت توقايەۆتىڭ جولداۋى اياسىندا مەملەكەت پەن حالىقتىڭ اراسىندا اشىق ديالوگ ورناتۋ ماقساتىندا رەسپۋبليكا كولەمىندە وتكىزىلدى.

ماڭىزى زور شاراعا ماڭعىستاۋ وبلىسىنداعى بارلىق دەڭگەيدەگى اكىمدەر مەن مەملەكەتتىك قىزمەتكەرلەر ازاماتتاردى جەكە قابىلداپ، تۇرعىندارمەن كەزدەستى. نەگىزگى ماقسات - حالىقپەن اشىق بايلانىس ورناتىپ، كەلىپ تۇسكەن ءوتىنىش، سۇراقتارىنا جاۋاپ بەرۋ. سونداي- اق، جەرگىلىكتى اتقارۋشى ورگاننىڭ وكىلدەرى ازاماتتاردى قابىلداۋ بارىسىندا كوتەرىلگەن ماسەلەلەردىڭ وڭ شەشىمىن تابۋعا ءوز ۇلەسىن قوسۋى ءتيىس.

ەستەرىڭىزگە سالا كەتەيىك، قابىلداۋ شاراسى تۋرالى الدىن الا حالىققا حابارلاندى. ياعني 15-16 -قاراشا كۇندەرى بايلانىس جەلىسى اشىلىپ، سونىڭ نەگىزىندە ءتىزىم ازىرلەنگەن بولاتىن. سول جەلى ارقىلى حابارلاسىپ، تىزىمگە جازىلعان ازاماتتار بۇگىن وزدەرىن مازالاعان ماسەلەلەرىن ورتاعا سالىپ، تولعاندىرعان سۇراقتارىن جەتكىزدى.

قابىلداۋعا كەلگەن تۇرعىندار دەنساۋلىق سالاسى، جۇمىسقا ورنالاسۋ، باسپاناعا قول جەتكىزۋ، سونداي-اق ءارتۇرلى الەۋمەتتىك ماسەلەلەردى كوتەردى. قازىرگى تاڭدا وبلىس بويىنشا اكىمدىكتەردىڭ قابىلداۋىنا 317 ادام تىركەلسە، وبلىس اكىمىنىڭ جەكە قابىلداۋىنا جۇزگە جۋىق ادام جازىلعان.

اۆتور: ءلايلىم ءالىم