ەلباسى «ەگەمەن قازاقستان» گازەتىن 100 جىلدىق مەرەيتويىمەن قۇتتىقتادى
ەلىمىزدىڭ باس باسىلىمنىڭ مەرەيتويىنا وراي ءوتىپ جاتقان سالتاناتتى شارادا ەلباسى قۇتتىقتاۋىن ق ر مەملەكەتتىك حاتشىسى قىرىمبەك كوشەربايەۆ وقىپ بەردى، دەپ حابارلايدى قازاقپارات ءتىلشىسى.
«ەلىمىزدىڭ جەتەكشى باسىلىمى، قازاق باسپا ءسوزىنىڭ قارا شاڭىراعى - «Egemen Qazaqstan» گازەتىنىڭ 100 جىلدىق مەرەيتويى قۇتتى بولسىن! ءبىر عاسىر بۇرىن «ۇشقىن» دەگەن اتپەن شىعا باستاپ، ۋاقىت وتە ۇلتتىق باسىلىمعا اينالعان تاۋەلسىز قازاقستاننىڭ اعا گازەتى ءوز پاراقتارىندا تاريح تاعىلىمىن ءداۋىر ۇنىمەن، ۋاقىت سىنىمەن بەينەلەپ، كەشەگى مەن بۇگىننىڭ اراسىن جالعاپ كەلەدى. جاڭالىقتى جۇرتشىلىققا جەدەل ءارى شىنايى تۇردە جەتكىزىپ، ەگەمەن ەلىمىزدىڭ مەملەكەتتىك ساياساتىن قالىڭ وقىرمان اراسىندا بايىپتى ناسيحاتتاپ، ەل شەجىرەسىن قاعازعا حاتتاعان بايىرعى باسىلىمنىڭ بەدەلى ءار دايىم بيىك»، - دەپ اتاپ وتەدى ق ر تۇڭعىش پرەزيدەنتى.
ەلباسى قۇتتىقتاۋ حاتىندا ۇلت مۇددەسى جولىندا ەڭبەك ەتكەن تالاي تۇعىرلى تۇلعالار باسشىلىق جاساپ، الىپتار نەگىزىن سالعان ءداستۇردى ابىرويمەن جالعاستىرعان «Egemen Qazaqstan» قازىرگى زامان تالابىنا ساي جاڭعىرىپ، عاسىرلىق تۋىن جاڭا جەتىستىكتەرمەن، تولايىم تابىستارمەن قارسى الىپ وتىرعاندىعىنا باسا نازار اۋدارادى.
«جەتەكشى باسپا ءسوز قۇرالىندا ەڭبەك ەتىپ جۇرگەن قالام يەلەرى جوعارى كاسىبي دەڭگەيىمەن تابىلىپ، باسىلىم الداعى ۋاقىتتا دا حالقىمىزدىڭ مۇرات-ماقساتى مەن قوعام دامۋىنا لايىقتى ۇلەسىن قوسا بەرەدى دەپ سەنەمىن»، - دەگەن نۇرسۇلتان نازاربايەۆ باسىلىم ۇجىمىنا زور دەنساۋلىق، شىعارماشىلىق تابىستار تىلەدى.