اۋىل حالقىنىڭ ءومىر ءسۇرۋ دەڭگەيىن كوتەرۋگە 100 ميلليارد تەڭگە ءبولىندى
بۇل تۋرالى ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«كەلەسى ماسەلەلەر بلوگى بۇل - شاعىن جانە ميكرو بيزنەستى دامىتۋ. جۇمىسسىزدىقتى ازايتۋ جانە اۋىل حالقىنىڭ ءومىر ءسۇرۋ دەڭگەيىن كوتەرۋ اياسىندا ۇلتتىق قوردان 100 ميلليارد تەڭگەگە جۋىق قاراجات ءبولىندى. مەملەكەت باسشىسى بيزنەستى دامىتۋ ءۇشىن بولىنەتىن بيۋدجەت قاراجاتىنىڭ جۇمسالۋىن ەسەپ كوميتەتىنە قارجى مينيسترلىگىمەن بىرلەسىپ ەرەكشە باقىلاۋعا الۋدى تاپسىردى»، - دەدى ول بۇگىن مەملەكەت باسشىسىنىڭ قازاقستان حالقىنا جولداۋىن تالقىلاۋعا ارنالعان ۇكىمەت وتىرىسىندا.
ونىڭ اتاپ وتۋىنشە، اعىمداعى جىلدىڭ سوڭىنا دەيىن ميكرو جانە شاعىن بيزنەس كومپانيالارىن ولاردىڭ تابىستارىنان ءۇش جىل مەرزىمگە سالىق تولەۋدەن بوساتۋ جونىندەگى زاڭنامالىق نەگىز ازىرلەنەدى. 2020 -جىلدىڭ قاڭتارىنان باستاپ شاعىن جانە ورتا بيزنەس سۋبەكتىلەرىن تەكسەرۋگە ءۇش جىلدىق تىيىم سالۋ كۇشىنە ەنەدى.
«قارجى مينيسترلىگى مەملەكەتتىك ساتىپ الۋ ماسەلەلەرى بويىنشا زاڭ جوباسىن ازىرلەدى. ول دا شاعىن بيزنەستى ىنتالاندىرۋعا باعىتتالعان. سونىمەن قاتار، قولما-قول اقشاسىز تولەمدەردى ىنتالاندىرۋ، كولەڭكەلى ەكونوميكاعا قارسى ءىس-قيمىل جونىندەگى جۇمىس كۇشەيتىلەدى. كاپيتالداردى شىعارۋمەن، سالىق تولەۋدەن باس تارتۋمەن كۇرەس قاتاڭداندىرىلادى»، - دەدى ءبىرىنشى ۆيتسە-پرەمەر.
ءا. سمايىلوۆ جاقىندا ەكونوميكالىق تەرگەۋ قىزمەتىنىڭ جۇمىسى قايتا قالىپتاستىرىلىپ، وڭتايلاندىرىلعانىن ەسكە سالدى.
«پرەزيدەنت سالىق جۇيەسىن ۇلتتىق تابىستى بارىنشا ءادىل بولۋگە نازار اۋدارا وتىرىپ، جاڭعىرتۋدى تاپسىردى. كومپانيالار ءۇشىن ادامي كاپيتالعا، ەڭبەك ونىمدىلىگىن ارتتىرۋعا، تەحنيكالىق قايتا جاراقتاندىرۋعا، ەكسپورتقا ينۆەستيتسيا سالۋعا ىنتالاندىراتىن اعىمداعى سالىق جۇيەسىنىڭ ساپاسىن ارتتىرۋ جونىندە شارالار قابىلدانادى. سالىق كودەكسىندە كوزدەلمەگەن تولەمدەرگە، الىمدارعا تىيىم سالىنادى»، - دەدى ۇكىمەت باسشىسىنىڭ ءبىرىنشى ورىنباسارى.
اۆتور: مارلان جيەمباي