اقتاۋدا ناۋرىز مەرەكەسىن تويلاۋعا 100 مىڭعا جۋىق ادام جينالدى
ناۋرىز مەيرامى - تابيعات انانىڭ جاڭارىپ، جاساناتىن، قايتا تۇلەيتىن ۋاقىتى. قازاق حالقىنىڭ كونە داستۇرلەرىنىڭ كوپشىلىگى وسى ناۋرىز مەرەكەسىمەن بايلانىستى. وسى سەبەپتى ونىڭ قازاق حالقىنىڭ ومىرىندە الار ورنى دا ەرەكشە. بيىل ماڭعىستاۋلىقتار كوكتەم مەرەكەسىن جىلداعىداي ەرتە تويلاپ باستادى. الدىمەن، امالدا باس قوسقان تۇرعىندار ەندى ناۋرىزدى دۇركىرەتىپ اتاپ ءوتتى.
تەڭىز جاعالاۋىنا ادەمى جاساۋمەن 26 كيىز ءۇي تىگىلدى. ءاربىر كيىز ءۇيدىڭ الدىندا ۇلتتىق تاعامداردان مەرەكەلىك داستارحان جايىلىپ، كوپشىلىككە ۇسىنىلدى. كيىز ۇيلەر شاعىن اۋىل تۇرىندە قويىلعان. ءار كيىز ءۇيدىڭ وكىلدەرى قالا تۇرعىندارى مەن قوناقتارى ءۇشىن تەاترلاندىرىلعان قويىلىمدار قويدى. ءاز- ناۋرىزدى اتاپ وتۋگە جاعالاۋعا ءجۇز مىڭعا جۋىق ادام جينالدى.
مەرەكەلىك شارا 500-دەن استام ادام قاتىسقان «ءاز - ناۋرىز- تاتۋلىق مەرەكەسى!» اتتى تەاترلاندىرىلعان قويىلىمنان باستالدى. ماڭعىستاۋ ارتىستەرى ءوز قويىلىمدارىندا ەلباسى نۇرسۇلتان نازاربايەۆتىڭ «ۇلى دالانىڭ جەتى قىرى» ماقالاسىندا ايتىلعان قازاق دالاسىندا ءومىر سۇرگەن ەجەلگى كوشپەلى حالىقتاردىڭ جەتى قازىناسىن كورسەتتى. قويىلىم ءۇش اكتىدەن تۇراتىن ۇلى جىبەك جولى كەرۋەنى كورسەتىلدى.
جاعالاۋدا ات، تۇيە، قازاقتىڭ تازى يتتەرى مەن بۇركىتتەرى ءجۇرىپ ءوتتى.
وبلىس اكىمى ەرالى توعجانوۆ بارلىق جينالعان قاۋىمدى ناۋرىز مەيرامىمەن قۇتتىقتادى.
«ناۋرىز - جاڭعىرۋ مەن جاڭارۋدىڭ، ەڭسەسى بيىك ەلدىكتىڭ، تاتۋلىق پەن بىرلىكتىڭ، ىرىس پەن مولشىلىقتىڭ بەلگىسى. ماڭعىستاۋدا ناۋرىز ايى قايىرىمدىلىق ايى بولىپ جاريالاندى. اقپان ايىنان باستاپ وڭىردە ءبىرقاتار قايىرىمدىلىق اكسيالارى ۇيىمداستىرىلدى. قالالار مەن اۋدانداردا جەرگىلىكتى كاسىپورىندار باسشىلارىنىڭ، كاسىپكەرلەردىڭ قولداۋىمەن 1842 مۇقتاج ادامعا، سونىڭ ىشىندە كوپبالالى وتباسىلارعا 32 ميلليون تەڭگە كولەمىندە كومەك كورسەتىلدى. سونداي- اق، قازاقستان حالقى اسسامبلەياسى حالىقتىڭ الەۋمەتتىك وسال توپتارىن قولداۋعا باعىتتالعان «قايىرىمدىلىق كەرۋەن» اكتسياسىنا باستاماشى بولىپ، ول 2019 -جىل بويى وتكىزىلەتىن بولادى»، - دەپ اتاپ ءوتتى ەرالى توعجانوۆ.
سونداي-اق، جاعالاۋدا قالانىڭ الەۋمەتتىك - ەكونوميكالىق دامۋىنا ەلەۋلى ۇلەس قوسقان قۇرمەتتى ازاماتتار مەن ەڭبەك ارداگەرلەرىنە قۇرمەت كورسەتىلدى جانە «ۇلىس كۇنى - ۇلى كوش» مادەنيەت مەكەمەلەرى ۇجىمدارىنىڭ شەرۋى جەرگىلىكتى قول ونەرشىلەردىڭ جارمەڭكەسى، «باۋىرساق» جارمەڭكەسى ۇيىمداستىرىلدى.
سونداي- اق، قالا كاسىپكەرلەرى قوناقتاردى ءتاتتى تاعامدار جارمەڭكەسىمەن قۋانتتى. قالا تۇرعىندارى مەن قوناقتارى «اسىق اتۋ»، ارقان تارتۋ، قول كۇرەستىرۋ، دارتس، شاحمات، قازاقشا كۇرەس، گىر كوتەرۋ، توعىز قۇمالاق سياقتى ءارتۇرلى سپورت تۇرلەرىنەن جارىسقا ءتۇستى. ءىس-شارا مەرەكەلىك باعدارلاما مەن وبلىستىڭ شىعارماشىلىق ۇجىمدارىنىڭ كونسەرتىنە ۇلاستى. سونداي- اق، جاعاجايدا «جىر عۇمىر» اتتى ءانشى-تەرمەشىلەردىڭ قالالىق بايقاۋى ءوتتى.
