11:01, 23 - ناۋرىز 2019 | GMT +6
سولتۇستىك قازاقستاندا قۇس فابريكاسىندا 100 گە جۋىق ۇيرەك جانىپ كەتتى
پەتروپاۆل. قازاقپارات - سولتۇستىك قازاقستان وبلىسى قىزىلجار اۋدانىنداعى بەسكول اۋىلىندا قۇس فابريكاسى ورتەندى، دەپ حابارلايدى قازاقپارات ءتىلشىسى.
س ق و توتەنشە جاعدايلار دەپارتامەنتى باسپا ءسوز قىزمەتىنىڭ حابارلاۋىنشا، «بەسكول قۇس فابريكاسى» ج ش س-داعى ءورت تۋرالى «101» تەلەفون نومىرىنە كۇندىزگى ۇشتەر شاماسىندا حابارلانعان. وقيعا ورنىنا جەتكەن ەكى ءورت ءسوندىرۋ ءبولىمىنىڭ ماماندارى جالىندى ءبىر ساعاتقا جەتەر-جەتپەس ۋاقىتتا تولىعىمەن سوندىرگەن. ناتيجەسىندە 2710 ۇيرەك امان قالدى.
قۇتقارۋشىلاردىڭ ايتۋىنشا، ءورت تۇرمىستىق بولمەدەن شىققان. جالپى اۋماعى - 16 شارشى مەتر. الدىن الا بولجام بويىنشا، وعان ەلەكتر سىمدارىنىڭ قىسقا تۇيىقتالۋى سەبەپ بولۋى مۇمكىن. ءورت ورنىنان 100 گە جاقىن ءولى ۇيرەك تابىلدى.
قازىر ماماندار ءورتتىڭ ناقتى نەدەن شىققانىن جانە كەلگەن شىعىن مولشەرىن انىقتاپ جاتىر.