الەمگە ورتاق 100 ءسوز جيناقتاعان پاۆلودارلىق وقۋشى ماسكەۋگە شاقىرتۋ الدى

None
None
استانا. قازاقپارات - وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىندە «زاماناۋي ءبىلىم بەرۋ تەندەنسيالارى، بولاشاققا كوزقاراس - بايتانايەۆ وقۋلارى-7» اتتى حالىقارالىق كونفەرەنسيادا پاۆلودارلىق وقۋشىنىڭ جوباسى كوپشىلىكتىڭ نازارىن اۋداردى، دەپ حابارلايدى pavlodarnews.kz.

- مۇنداي حالىقارالىق شارا وسىمەن جەتىنشى رەت وتۋدە، - دەيدى ۇيىمداستىرۋشىلاردىڭ ءبىرى، عىلىمي زەرتتەۋ جۇمىستارى ءبولىمىنىڭ باسشىسى جانات يبراگيموۆا. - وسى جىلى كونفەرەنسيا جيناقتارى ءۇش توم بولىپ باسىلدى. جىل سايىن قاتىسۋشىلار سانى ارتۋدا. قازاقستان، رەسەي، تۇركيا، وزبەكستان جانە تاعى باسقا ەلدەردەن 400-دەن اسا جۇمىس كەلىپ ءتۇستى. شەت ەلدى ايتپاعاننىڭ وزىندە اقتوبە، الماتى، شىمكەنت، تۇركىستان، پاۆلودار وڭىرلەرى باق سىنادى.

اتالمىش جيىندا پاۆلودار وبلىسىنىڭ نامىسىن قورعاعان ى. التىنسارين اتىنداعى دارىندى بالالارعا ارنالعان قازاق گيمنازيا- ينتەرناتىنىڭ 8 -سىنىپ وقۋشىسى رامازان داۋرەنبەك ۇلى بۇكىل الەمگە ورتاق سوزدەر ارقىلى ءبىر تىلدە سويلەيتىنىن دالەلدەۋگە تىرىستى.

- بۇل جۇمىستى وتكەن جىلدان بەرى جازىپ كەلەمىن، - دەيدى 8 -سىنىپ وقۋشىسى. - قازىرگى تاڭدا الەمگە ورتاق 100 ءسوز تاپتىق. ماقساتىم - قازاق ءتىلى ءبىلىمىنىڭ عىلىمىنا جاڭا كوزقاراس الىپ كەلۋ. شىن مانىندە الەم حالىقتارىنىڭ سوزدەرىن قازاق تىلىندەگى سوزدەرمەن سالىستىرا قاراعاندا قىزىق جايتكە تاپ بولاسىز. اعىلشىنداردا hot دەگەن ءسوز بار. ول «ىستىق» دەگەن ماعىنا بەرەدى. ال بىزدە وسىمەن دىبىستاس «وت» دەگەن ءسوز بار. مىنە، ءبىز وسىدان كەيىن ءبىر لەكسيكا- سەمانتيكالىق توپتاعى ءتۇرلى تىلدەردە فونەتيكالىق ۇندەس سوزدەردى جيناقتاي باستادىق.

جاس عالىمعا جەتەكشىلىك جاساپ جۇرگەن ۇستازى باقداۋلەت نۇرماتتىڭ ايتۋىنشا، بۇل تاقىرىپ كوپشىلىكتىڭ قىزىعۋشىلىعىن تۋدىرىپ، كونفەرەنسيا بارىسىندا قىزۋ تالقىعا تۇسكەن.

- بيىلعى جىلدىڭ كوكتەمىندە وسى تاقىرىپپەن ماسكەۋدە وتەتىن كونفەرەنسياعا قاتىسۋعا شاقىرتۋ الدىق، - دەيدى ۇستازى. - ستۋدەنت كەزدەن وسى جوباعا دەگەن قىزىعۋشىلىق بولاتىن. رەسەي مەن ساۋد ارابياسى ەلدەرىندە وسى جۇمىس تۋرالى باياندامالار جاريالاندى. بۇگىندە شاكىرتىم الەمگە ورتاق سوزدەردى ىزدەستىرۋ ارقىلى دۇنيە جۇزىندەگى ءارتۇرلى ەلدەردى ءوزارا جاقىنداستىرا تۇسەدى دەگەن ويدامىن.

سوڭعى جاڭالىقتار