شىمكەنتتە كوپبالالى وتباسىلارعا جىلىنا ءبىر رەت 100 مىڭ تەڭگەدەن بەرىلەدى

شىمكەنت. قازاقپارات - شىمكەنتتە كوپبالالى انالار ءۇشىن ارنايى ورتالىق اشىلىپ، جىلىنا ءبىر رەت 100 مىڭ تەڭگە كولەمىندە كومەك بەرىلەدى، دەپ حابارلايدى قازاقپارات.

شاھار باسشىسى عابيدوللا ءابدىراحىموۆ بۇگىنگى حالىق الدىنداعى ەسەبىندە وسىلاي دەدى.

«شىمكەنتتە كوپبالالى انالار ءۇشىن ارنايى ورتالىق اشىلادى. وندا انالار اكىمدىكتىڭ بارلىق قىزمەتىنە قول جەتكىزە الادى. سونىمەن قاتار، تابىسى كۇنكورىس دەڭگەيىنەن تومەن وتباسىلارعا جىلىنا ءبىر رەت بەرىلەتىن كومەك كولەمى 25 مىڭ تەڭگەدەن 100 مىڭ تەڭگەگە دەيىن ارتىپ، بۇل قارجى كەلەسى وقۋ جىلىنا دايىندىق ءۇشىن تامىز ايىندا بەرىلەدى»، - دەدى قالا اكىمى.

بۇعان قوسا جەكەمەنشىك ۇيلەرگە گاز تاراعاندا دابىل بەرەتىن ارنايى 1000 قۇرال اكىمدىك تاراپىنان ورناتىلماق.

ايتا كەتەيىك، شىمكەنتتە 2200 التىن القا يەگەرى، 6600 كۇمىس القا يەگەرى، 511 باتىر انا، 700 دەن اسا 1 جانە 2-دارەجەلى وردەنمەن ماراپاتتالعان جانە 3200 كوپبالالى انا بار.