گاۋھار ءوزىن سوتقا بەرگەن ايەلگە اي سايىن 100 مىڭ تەڭگەدەن بەرىپ كەلگەن
ءانشىنىڭ اعاسى ەلدىڭ كوڭىلىن كۇپتى ەتكەن ساۋالدارعا جاۋاپ بەردى.
ءادىلحان الىمبەكوۆ «قازاق ءۇنى» باسىلىمىنىڭ ءتىلشىسى دينار كاميل قىزىنا سۇحبات بەرگەن.
سازگەردى سوتقا بەرگەن باقىت نازاروۆا اۋاعا ۇشقان 40 مىڭ دوللاردى قايتارۋ ءۇشىن بىرنەشە مارتە نەسيە الىپ، ابدەن قارىزدانعانىن ايتقان ەدى. الايدا ءادىلحان الىمبەكوۆ مۇنى جوققا شىعارىپ وتىر. ايتۋىنشا، گاۋھار وسى ۋاقىتقا دەيىن ءوزىن سوتقا بەرگەن ەكس-قۇربىسىنا اي سايىن 100 مىڭ تەڭگەدەن بەرىپ وتىرعان.
«ەشكىمدى قارالاعانىم ەمەس، ءبىراق ايتپاسقا لاج جوق. جابىرلەنۋشى باقىت نازاروۆا گاۋھارعا اقشا تاۋىپ بەرۋ جولىندا كولىگىمدى ساتتىم، نەسيە الدىم دەگەندى ايتىپتى. كەشىرىڭىزدەر، ول كىسى تىعىرىققا تىرەلەتىندەي جاعدايدا ەمەس. قالادا ەكى بىردەي پاتەرى بار. ساۋدا نۇكتەلەرى جانە بار. اشىعىن ايتقاندا ءتورت قۇبىلاسى تەڭ، تىرلىگى ءبۇتىن ادام.
قارىنداسىمدى قىرىق مىڭ دوللارىمدى جەپ قويدى دەپ قالايشا اۋزى بارىپ ايتادى؟ ءوز قولىمەن «اقكەنت» تۇرعىن ءۇي كەشەنىنىڭ اكىمشىلىگىنەن پاتەردىڭ كىلتىن الىپ، ونى قاننەن- قاپەرسىز جالعا بەرىپ كەلدى عوي. ەندى كەلىپ قالتاسىنان شىققان شىعىندى گاۋھاردىڭ ەسەبىنەن تۇگەندەپ، قالابەردى ءوزىنىڭ ابىرويىن ساقتاپ قالۋ ماقساتىندا وسىنداي قارەكەتكە بارىپ وتىر. «سەنىڭ ايتۋىڭمەن ءۇي الامىن دەپ، جەتكىزە الماي جاتىرمىن» دەگەن جەلەۋمەن گاۋھاردان اي سايىن ءجۇز مىڭ تەڭگەدەن الىپ وتىردى. كەيىن مەن بۇعان شىداي الماي، الاياققا الدانعان ادامداردىڭ قاتارىندا ءوزى دە بارىن ايتىپ، ۇرىسىپ وتىرىپ گاۋھاردىڭ اقشا بەرۋىن توقتاتتىم. ءبىراق سوڭعى سوت پروتسەسىندە «ايىپتى بولعان سوڭ جابىرلەنۋشىگە اي سايىن اقشا بەرىپ كەلدىڭ» دەگەن سوزدەر ايتىلىپ، گاۋھاردىڭ جاساعان جاقسىلىعى وزىنە تاياق بولىپ تيگەن»، - دەيدى ءادىلحان الىمبەكوۆ.
ەسكە سالا كەتەيىك، گاۋحار الىمبەكوۆانىڭ الاياقتىق ءۇشىن 6 جىلعا باس بوستاندىعىنان ايىرىلعانى بەلگىلى بولدى. وتاندىق جۇلدىزدار سوتتالعان الىمبەكوۆاعا قولداۋ ءبىلدىردى.
كەيىننەن الىمبەكوۆانىڭ ەلباسىدان اراشا سۇراپ، حات جازعانى انىقتالدى. ال سازگەردى سوتقا بەرگەن باقىت نازاروۆا ءوز شىندىعىن ايتىپ، ونى تۇرمەگە جابۋدى ويلاماعانىن، تەك اقشاسىن قايتارعىسى كەلەتىنىن جەتكىزدى.
سونداي-اق، الىمبەكوۆانىڭ تەمىر توردىڭ ار جاعىنان حالىققا جولداعان حاتى جاريالاندى.