قىتايلىق كومپانيا سولتۇستىك قازاقستانعا 100 ميليون دوللار قارجى قۇيماق
شەتەلدىكتەردى قابىلداعان قۇمار اقساقالوۆ بۇعان دەيىن قىزىلجار وڭىرىندە اۋىل شارۋاشىلىعى سالاسىندا قىتايلىق سەرىكتەستەرمەن بىرلەسكەن بىرنەشە جوبانىڭ جۇزەگە اسىرىلعاندىعىن تىلگە تيەك ەتتى. بۇل جولى بايلانىس قۇرىلىس سالاسىندا ورناماق.
«بۇگىندە قۇرىلىس سالاسىنا ينۆەستورلاردى تارتۋ ماڭىزدى. بىلتىر بۇل سالاعا قۇيىلعان قارجى كولەمى 80 ميلليارد تەڭگەگە جەتتى. 2019 -جىلعا مەجەلەگەن جوسپار ودان دا كوپ. 1780 پاتەر، الەۋمەتتىك جانە كوممەرتسيالىق نىساندار تۇرعىزىلادى. شەتەلدىك ينۆەستورلارعا ءبىزدىڭ ەلىمىزدە ءبىراز جەڭىلدىكتەر قاراستىرىلعان. بىرىنشىدەن، كەدەن جانە سالىق شىعىندارىنا جەڭىلدىك بار. ينفراقۇرىلىمدى ءوزىمىز تەگىن جاساپ بەرە الامىز» ، - دەدى سولتۇستىك قازاقستان وبلىسىنىڭ اكىمى قۇمار اقساقالوۆ.
«Shaanxi Cool Chemical» قىتايدا عانا ەمەس، باسقا دا مەملەكەتتەردە بەدەلى بار، تاجىريبەسى باي كومپانيا. قازىر اتالعان كاسىپورىن ورتالىق ازيا جانە ت م د ەلدەرىندە ءتۇرلى جوبالاردى جۇزەگە اسىرۋدا. ينۆەستور ەندى قازاقستاندا جۇمىس ىستۋگە نيەتتى. شەتەلدىكتەردى پەتروپاۆلدا قۇرىلىسى جوسپارلانعان 800 ورىندىق كوپسالالى اۋرۋحانا جوباسى قىزىقتىردى.
«ءبىز كوپسالالى اۋرۋحانا مەن تۇرعىن ۇيلەردى سالۋعا ءوز قىزىعۋشىلىعىمىزدى بىلدىرەمىز. بۇل باعىتتا بىزدە مول تاجىريبە بار. ورتالىق ازيا ەلدەرىندە نەگىزىنەن زاۋىتتار مەن اۆتوجولدار سالامىز. ءبىز سولتۇستىك وڭىرگە 100 ميلليون دوللارعا دەيىن ينۆەستيتسيا قۇيۋعا ءازىرمىز. جوبا تولىقتاي دايىن بولعان سوڭ، جۇزەگە اسىرۋعا كىرىسەمىز. سونداي- اق حيميا ونەركاسىبى، اۋىل شارۋاشىلىعى جانە اۆتوجول قۇرىلىسى سالالارىندا ءتۇرلى جوبالاردى ىسكە اسىرۋعا دايىنبىز» ، - دەدى چاڭ گاوگينگ.
جۋىق ارادا قىتايلىق كومپانيانىڭ ماماندارىنان قۇرالعان ۇلكەن دەلەگاتسيا جوبالاردى تالقىلاۋ ءۇشىن وبلىسقا جۇمىس ساپارىمەن كەلمەك.
ەلميرا كالەنوۆا