قىزىلوردادا 100 دەن استام قوي بەلگىسىز دەرتتەن قىرىلىپ قالدى

 قىزىلوردا. قازاقپارات - قىزىلوردا وبلىسى جاڭاقورعان اۋدانىنا قاراستى شالقيا كەنتىنىڭ تۇرعىنى احمەت راحيموۆتىڭ ۋاق مالى شىعىنعا ۇشىرادى، دەپ حابارلايدى قازاقپارات ءتىلشىسى.

مال يەسىنىڭ ايتۋىنشا، بۇگىنگى كۇنگە دەيىن 116 قوي ازىرگە بەلگىسىز اۋرۋدان شىعىن بولعان. وعان جاڭاقورعان اۋداندىق ۆەتەريناريالىق زەرتحاناسى 10 - قاراشا كۇنى لەپتوسپيروز اۋرۋىنان قىرىلدى دەپ دياگنوز قويعان. سونداي- اق، مال ازىقتان (سۋدان) ۋلانۋى مۇمكىن دەگەن دە جورامال ايتىلىپ وتىر. اۋىرعان مال وقشاۋلانىپ، قان سارىسۋى جانە قوسىمشا انتيبيوتيكتەرمەن ەمدىك شارالار جۇرگىزىلگەن.

«جاڭاقورعان اۋداندىق اكىمدىگىنىڭ 12 - قاراشاداعى حاتىنا سايكەس، شالقيا كەنتىنىڭ تۇرعىنى احمەت راحيموۆتىڭ ۋاق مالى شىعىن بولعانى تۋرالى حابارلاندى. ۆەتەرينار ماماندار ەپيزووتيالىق زەرتتەۋ بارىسىندا اۋرۋ وشاعىندا ولگەن 30 ولەكسەنى ورتەپ، بايكەنجە اۋىلدىق وكرۋگىندەگى تيپتىك جوباداعى مال قورىمىنا تاستادى. ايتا كەتەلىك، وسى اۋماقتاعى ءبىرقاتار شارۋالاردىڭ يەلىگىندەگى 2420 باس مالعا الماتى اگرارلىق ۇلتتىق ۋنيۆەرسيتەتىنىڭ «سانا» ج ش س- نەن شىققان ۆاكسينا الدىن الا ەگىلگەن. قازىر ونداعى جاعداي تۇراقتى» ، - دەدى وبلىستىق ۆەتەريناريا باسقارماسىنىڭ باسشىسى ەرسۇلتان اپەتوۆ.

مال تۇرعان قوراجايلارعا زالالسىزداندىرۋ شارالارى جۇرگىزىلدى. ءتيىستى ۆەتەريناريالىق شارالار اتقارىلدى. اتالمىش جاعداي قاتاڭ باقىلاۋعا الىنعان. وسى جاعدايعا بايلانىستى وبلىستىق ۆەتەريناريا باسقارماسىنان، ق ر ا ش م ۆەتەريناريالىق باقىلاۋ جانە قاداعالاۋ كوميتەتى وبلىستىق اۋماقتىق ينسپەكتسياسىنان جانە وبلىستىق ۆەتەريناريالىق زەرتحانادان ماماندار ءتيىستى زەردەلەۋ جۇمىستارىنا جىبەرىلگەن.

 وبلىستىق ۆەتەريناريا باسقارماسىنىڭ باسشىسى ەرسۇلتان اپەتوۆتىڭ ايتۋىنشا، لەپتوسپيروز اۋرۋى قاۋىپتى دەرتتەردىڭ قاتارىنا جاتادى. مالدىڭ لەپتوسپيروز اۋرۋىنان ولگەنى دالەلدەنسە، مال شىعىنى بولعان ازاماتقا ءتيىستى وتەماقى تولەنۋى ءتيىس.

 ءدال وسىنداي جاعداي 2015 -جىلدىڭ جاز ايلارىندا  قىزىلوردا وبلىسىندا تىركەلگەن ەدى.