قىزىلوردادا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» اتتى شارا ءوتتى

قىزىلوردا. قازاقپارات - قىزىلوردا وبلىسى اكىمدىگىنىڭ ۇيىمداستىرۋىمەن «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» اتتى شارا ءوتتى، دەپ حابارلايدى قازاقپارات ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.

اتالمىش شاراعا وبلىس اكىمى قىرىمبەك كوشەربايەۆ، «ۇلتتىق اۋدارما بيۋروسىنىڭ» اتقارۋشى ديرەكتورى راۋان كەنجەحان ۇلى قاتىستى.

وبلىس اكىمى مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى ەل ءۇشىن رۋحاني سىلكىنىس جاساعان تىڭ باستاما بولعانىن جەتكىزدى.

«رۋحاني جاڭعىرۋ» باعدارلاماسىنداعى ماڭىزدى باعىتتاردىڭ ءبىرى - «سانانىڭ اشىقتىعى» . وسى ماقساتتا تالانتتى دا تالاپتى بالالارىمىزدىڭ زاماناۋي ءبىلىمدى يگەرۋى، وركەنيەت تالاپتارىنا ساي بولۋى ءۇشىن بارىنشا جاعداي جاسالۋدا. بىلتىر باعدارلامانىڭ ىشىندەگى «100 جاڭا وقۋلىق» ارنايى جوباسى بويىنشا مەملەكەت باسشىسى نۇرسۇلتان نازاربايەۆتىڭ ۇسىنىسىمەن رەسپۋبليكادا «ۇلتتىق اۋدارما بيۋروسى» قوعامدىق قورى قۇرىلعانى بەلگىلى. بۇگىنگى كۇنى قوعامدىق قور گۋمانيتارلىق عىلىم سالاسىنداعى ۇزدىك 100 وقۋلىقتى تاڭداپ، ولاردى قازاق تىلىنە اۋدارىپ جاتىر. العاشقى 18 كىتاپ وقىرمان قولىنا ءتيدى»، - دەدى وبلىس اكىمى.

اتالمىش جوبا بويىنشا 300 دەن اسا ادام جۇمىس جاساۋدا. اتاپ ايتقاندا، عالىمدار، وقىتۋشىلار، اۋدارماشىلار، بەتتەۋشىلەر، كونتەنت جاساۋشىلار، پروگرامميستەر.

ءوز كەزەگىندە «ۇلتتىق اۋدارما بيۋروسىنىڭ» اتقارۋشى ديرەكتورى راۋان كەنجەحان ۇلى «باستى ماقسات - بارلىق كىتاپتاردى ءوز بەتىمەن اۋدارىپ شىعارۋ ەمەس، وسى جوباعا اتسالىساتىن ورتانى جۇمىلدىرۋ. ونى جەكەلەگەن ۇيىم ءوز بەتىمەن اتقارا المايدى. ويتكەنى، اۋدارما - كۇردەلى دە اۋقىمدى شىعارماشىلىق جۇمىس. اۋدارما جۇمىسى باستالماس بۇرىن، بارلىق جوعارى وقۋ ورىندارىنان ءزارۋ، ماماندىققا قاجەتتى وقۋلىقتارعا سۇراۋ سالىنعان. 800 دەن استام وقۋلىقتىڭ ءتىزىمى ىرىكتەلدى. ال، اۋدارىلاتىن وقۋلىقتارعا قويىلاتىن تالاپتىڭ ءبىرى - ول بەلگىلى ءبىر يدەيالاردان بەيتاراپ بولۋ. وسى جانە تاعى بىرنەشە قويىلعان كريتەرييلەر نەگىزىندە 18 وقۋلىق ىرىكتەلىپ الىندى. ءارقايسىسى 10 مىڭ دانامەن شىعارىلعان كىتاپتار، بۇگىندە وقۋ ورىندارى مەن كىتاپحانالارعا تەگىن تاراتىلدى»، - دەدى.

اتالمىش شارا بارىسىندا قاتىسۋشىلار تاراپىنان سان الۋان ساۋالدار قويىلدى. وعان «ۇلتتىق اۋدارما بيۋروسىنىڭ» اتقارۋشى ديرەكتورى راۋان كەنجەحان ۇلى، «ۇلتتىق اۋدارما بيۋروسىنىڭ» رەداكسيالىق القا مۇشەسى شەرۋباي قۇرمانباي ۇلى جان-جاقتى جاۋاپ بەردى.