وڭتۇستىك قازاقستاندا 100 گە جۋىق جەتىم بالا باسپانالى بولادى
مەرەكەلىك جيىندا بالالار ۇيىندە تاربيلەنىپ جاتقان 350 گە جۋىق جەتكىنشەككە سىي-سياپات جاسالدى. شاراعا وبلىس اكىمى جانسەيىت تۇيمەبايەۆ ارنايى قاتىسىپ، بۇلدىرشىندەردى ايتۋلى مەرەكەمەن قۇتتىقتادى، دەپ حابارلايدى قازاقپارات.
«ەلباسىمىز ءوز سوزىندە ۇرپاق بولاشاعىنا اسا ءمان بەرىپ، «ەلىمىزدە تۋعان ءاربىر بالانى مەملەكەت ءوز قامقورلىعىنا الۋعا ءتيىس» دەگەن بولاتىن. مىنە، وسى باعىتتا وبلىستا مەملەكەتتىك باعدارلاما اياسىندا 2016-2017 -جىلدارى 142 جەتىم جانە اتا-اناسىنىڭ قامقورلىعىنسىز قالعان بالالارعا ءۇي بەرىلدى. 2018 -جىلى 90 بالا ءۇيلى بولادى. سونداي-اق جىل سايىن بالالار ءۇيىنىڭ تاربيەلەنۋشىلەرىنە، جوعارى وقۋ ورىندارىنا وبلىس اكىمىنىڭ ءبىلىم گرانتتارى بولىنۋدە. ماسەلەن، وتكەن جىلى 95 گرانت بولىنسە، بيىل 100 گرانت قاراستىرىلعان. ءبىلىمدى بولىڭدار! سەندەردىڭ ەلىمىزدىڭ بەدەلدى ازاماتى بولاتىندارىڭا كامىل سەنەمىن»، - دەدى جانسەيىت تۇيمەبايەۆ.
سونداي-اق ايماق باسشىسى ءتۇرلى بايقاۋلاردا توپ جارىپ جۇرگەن ونەرلى بالالار ءۇيىنىڭ 10 وقۋشىسىن «العىس حاتپەن» ماراپاتتادى. ودان بولەك، جيىنعا قاتىسقان بارلىق بالعىندارعا ءتۇرلى ويىنشىقتار، كينوتەاترعا جانە استانا قالاسىنا جاسالاتىن ۇشكۇندىك ەكسكۋرسياعا (50 بالاعا) بيلەتتەر ۇلەستىردى.
و ق و اكىمدىگىنەن ءمالىم ەتكەندەي، شارا بارىسىندا بالالارعا ارنالعان مەرەكەلىك داستارحان جايىلىپ، كونتسەرتتىك باعدارلاما قويىلدى. سونىمەن قاتار، بالالار جايلاۋكول دەمالىس ايماعىنداعى اتتراكتسيونداردا كوڭىل كوتەرىپ، اسفالتتا سۋرەت سالۋ بايقاۋىنا قاتىستى.
ايتا كەتەيىك، و ق و- داعى 3 ميلليون حالىقتىڭ 1 ميلليون 240 مىڭنان استامىن 18 جاسقا دەيىنگى بالالار قۇرايدى. وبلىستا 2648 جەتىم جانە اتا-اناسىنىڭ قامقورلىعىنسىز قالعان بالا بولسا، ونىڭ 2068 ى قورعانشىلىق جانە قامقورشىلىققا، 184 ى پاتروناتتىق تاربيەگە وتكەن. 349 بالا ۇيلەرىندە تاربيەلەنۋدە.