قازاقستانداعى «100 ەسىم»: سەمەيدە مۇمكىندىگى شەكتەۋلى شەبەر تەمىردەن ءتۇيىن تۇيەدى
شىنىندا، بويىندا باسقاعا ۇلگى بولارلىق ىسكەرلىك، ادامگەرشىلىك قاسيەتتەرى بار تۇلعالار قوعامدا از ەمەس. تەك ولاردى جۇرت وزدەرى دە تانىپ، وزگەگە دە ۇلگى ەتۋلەرى ءتيىس. سونداي ىزگى جانداردىڭ ءبىرى، «100 جاڭا ەسىم» جوباسىنىڭ جەڭىمپازدارى قاتارىنان كورىنگەن سەمەيلىك قولونەر شەبەرى ابىلايحان اسىلباي.
53 جاستاعى ابىلايحان اسىلباي - ارباعا تاڭىلعان ءبىرىنشى توپتاعى مۇگەدەك. ءبىراق قيمىل- قوزعالىس مۇمكىندىگىنىڭ شەكتەۋلى بولعانىنا قاراماستان، ول تەمىردەن ءتۇيىن تۇيەتىن شەبەر، قولى قارىقتى ۇستا. اسىرەسە قازاق باتىرلارىنىڭ جابدىقتارىن جاساعاندى جانى سۇيەدى، كەز كەلگەن تەمىر بۇيىمعا جان ءبىتىرىپ، كەرەكسىز قالعان تەمىر- تەرسەككە ەكىنشى ءومىر سىيلاي الادى. ابىلايحان اسىلباي بۇگىندە ءۇيىنىڭ ءبىر بولمەسىن ءوزىنىڭ شاعىن مۇراجايىنا اينالدىرعان. مۇندا شەبەردىڭ قولىنان شىققان دۋلىعا، ساۋىت-سايمان، قارۋ-جاراق، ساداق جانە ءتۇرلى اشەكەي بۇيىمدارىن كورۋگە بولادى. بارلىعى قولدا بار ماتەريالداردان جاسالعان.
«مەنىڭ اكەم دە، اتام دا قولونەر شەبەرى، ۇستا بولعان كىسىلەر. سوندىقتان مۇنى ماعان قانمەن بەرىلگەن قاسيەت دەپ سانايمىن. جاۋىنگەرلەردىڭ ساۋىت- سايماندارىنان باسقا ايەلدەردىڭ ۇلتتىق اشەكەيلەرىن، ءتۇرلى تۇرمىستىق زاتتاردى جاسايمىن. كەز كەلگەن ماتەريالداردان. ونىڭ ىشىندە قاۋىرسىن بانكىلەرىن دە پايدالانامىن»، - دەيدى شەبەردىڭ ءوزى.
ۇستانىڭ اڭگىمەسىنە قاراعاندا، ول 34 جاسىنا دەيىن قولونەر شەبەرلىگىمەن اينالىسپاعان. 1996 -جىلى ونىڭ تاعدىرىن مۇلدەم باسقا ارناعا بۇراتىن جازاتايىم وقيعا ورىن العان. سول جىلى قۇرىلىستا جۇرگەن كەزدە كراننان قۇلاپ، ومىرتقاسى قاتتى زاقىمدانادى. وسىلايشا، مۇگەدەكتىك ارباسىنا تاڭىلعان ازامات وسى سىرقاتىمەن 3 جىل كۇرەسكەن. ءتۇرلى جاتتىعۋلار جاساپ، اياققا قايتا تۇرۋ ءۇشىن بارىن سالادى. اقىرى بالداقپەن جۇرە الاتىن دارەجەگە جەتەدى. سودان بەرى قولونەرلىك ىسىنە بەت بۇرعان. ايگىلى ۇستا داركەمباي شوقپاروۆتان الماتى قالاسىندا ءتالىم الادى. وسىلايشا، قولونەردىڭ قىر-سىرىن ۇيرەنەدى.
بۇگىندە شەبەردىڭ قولىنان شىققان تۋىندىلارعا سۇرانىس كوپ. ول قازاقستان شەبەرلەرىنىڭ اراسىندا وتەتىن كورمەلەر مەن بايقاۋلارعا قاتىسىپ، جەڭىمپاز بولىپ ءجۇر.