جىل سايىن قازاقستاندا 100 مىڭنان استام شەتەلدىك اكىمشىلىك جاۋاپقا تارتىلادى
بۇگىن پارلامەنت ماجىلىسىندەگى ۇكىمەت ساعاتىندا ق ر ىشكى ىستەر ءمينيسترى قالمۇحانبەت قاسىموۆ وسىلاي ءمالىم ەتتى، دەپ حابارلايدى قازاقپارات.
«زاڭدى كوشىپ-قونۋعا ارنالعان شارتتاردى جەڭىلدەتۋمەن قاتار، زاڭسىز كوشى-قوننىڭ جولىن كەسۋ بويىنشا شارالار قابىلدانۋدا. زاڭسىز كوشىپ-قونۋشىلاردى انىقتاۋعا جانە شەتەلدىكتەردىڭ ەلدە بولۋ قاعيدالارىن ساقتاۋىن باقىلاۋعا باعىتتالعان رەسپۋبليكالىق جانە وڭىرلىك «ميگرانت» جەدەل- پروفيلاكتيكالىق ءىس-شارا جۇرگىزىلەدى. ەلىمىزدە زاڭسىز كوشى-قون نەگىزىنەن ەڭبەك ميگرانتتارىنىڭ اراسىندا بايقالادى. سوندىقتان ءبىرىنشى كەزەكتە بازارلار، ساۋدا ورتالىقتارى، قۇرىلىس الاڭدارى تەكسەرىلەدى. اۋىل شارۋاشىلىعى كاسىپورىندارىنىڭ جانە شارۋاشىلىق سۋبەكتىلەرىن باقىلايمىز»، - دەدى ۆەدومستۆو باسشىسى.
بۇدان باسقا، ۇ ق ش ۇ ەلدەرى (قازاقستان، رەسەي، ارمەنيا، بەلارۋس، قىرعىزستان، تاجىكستان) «زاڭسىز كەلۋشى» جەدەل- پروفيلاكتيكالىق ءىس-شارانى جىل سايىن جۇزەگە اسىرادى.
«ەلگە زاڭسىز كىرۋ - قازىر قىلمىستىق تەرىس قىلىقتار ساناتىنا جاتادى. بۇرىن بۇل تەك اكىمشىلىك قۇقىقبۇزۋشىلىق بولىپ سانالاتىن. بۇگىندە ەلگە زاڭسىز كىرگەن ادامعا 1 مىڭ ا ە ك دەيىن ايىپپۇل سالىنادى نەمەس ءبىر جىلعا دەيىن باس بوستاندىعىنان ايىرىلىپ، ەلدەن شىعارىلادى. سونىمەن قاتار ەلدەن شىعۋدان جاسىرىنۋ، رۇقساتسىز جۇمىس ىستەۋ جانە تىركەلمەگەن ورىندا تۇرعانى ءۇشىن 25 ا ە ك كولەمىندە ايىپپۇل سالىنادى. بۇل زاڭ بۇزۋ فاكتىلەرى قايتالانعان جاعدايدا 15 كۇنگە دەيىن اكىمشىلىك قاماۋعا الىنادى، ەل اۋماعىنان شەتتەتىلەدى»، - دەپ ەسكە سالىپ ءوتتى ق. قاسىموۆ.
اتاپ ايتقاندا، 2015 -جىلى اكىمشىلىك قۇقىق بۇزۋشىلىق، قىلمىستىق كودەكستەرگە جاڭا تالاپتار قوسىلدى. وعان سايكەس، كوشى-قون زاڭناماسىن بۇزعان ادامدارعا بىردەن ەلدەن شىعارۋ اكىمشىلىك جازاسى قولدانىلا باستادى. قازاقستاننان شىعارىلعان بارلىق شەتەلدىكتەر ءبىزدىڭ ەلىمىزگە بەس جىل وتكەننەن كەيىن عانا قايتىپ كەلە الادى.
«جىل سايىن 100 مىڭنان استام شەتەل ازاماتتارى اكىمشىلىك جاۋاپقا تارتىلادى، ولارىڭ 10 مىڭنان استامى ەلدەن شىعارىلادى. شەتەلدىك جۇمىس كۇشىن زاڭسىز پايدالانعان ەكى مىڭنان استام جۇمىس بەرۋشىگە ايىپپۇل سانكسياسى سالىندى. وتكەن جىلى بيۋدجەتكە 115 ميلليون تەڭگە قارجى ءتۇستى. قىلمىستىق كودەكستە زاڭسىز كوشى-قوندى ۇيىمداستىرعان ادامعا بەس مىڭ ا ە ك كولەمىندە ايىپپۇل نەمەسە 7 جىلعا دەيىن باس بوستاندىعىنان ايىرۋ بەلگىلەنگەن. وتكەن جىلى وسىنداي فاكتىلەر بويىنشا 89 قىلمىستىق ءىس قوزعالعان»، - دەدى ق. قاسىموۆ.